កូរ៉េខាងត្បូង៖ កម្មវិធី Seoul Music Awards ទើបតែប្រព្រឹត្តិទៅយ៉ាងរលូនកាលពីល្ងាចថ្ងៃទី១៥នេះ ដោយមានការចូលរួមពីសំណាក់តារាល្បីៗជាច្រើនាក់។ ជាមួយគ្នានេះដែរក្រុមចម្រៀងបុរស  BTS ក៏ទើបតែបានទទួលពានរង្វាន់ Bonsang ពីកម្មវិធីមួយនេះផងដែរ។

បន្ទាប់ពីបានទទួលពានមួយនេះ សមាជិកច្បងរបស់ក្រុម BTS កំលោះ Kim Seok Jin ក៏បាននិយាយទៅកាន់គ្រប់គ្នាថា៖ «ជាការពិត ខ្ញុំចង់និយាយប្រាប់អ្នកទាំងអស់គ្នាថាពេលនេះ ពួកយើងកំពុងតែរៀបចំអាល់ប៊ុមចម្រៀងថ្មី ប៉ុន្ដែវាមិនទាន់រួចរាល់នៅឡើយទេ ពួកយើងទាំងអស់គ្នាបានព្យាយាមយ៉ាងខ្លាំងសម្រាប់អាល់ប៊ុមថ្មីនេះ ហេតុនេះសូមអ្នកទាំងអស់គ្នាចាំជួយគាំទ្រផង»។

សមាជិកក្រុម BTS រូបនេះក៏លើកឡើងពីក្រុមថ្មីឈ្មោះ TXT ដែលជាសិស្សប្អូនរួមផលិតកម្មថា៖«សិស្សប្អូនដំបូងរបស់ពួកយើងនឹងបង្ហាញខ្លួនជាផ្លូវការឆាប់នេះហើយ ចាំមើលពួកគេទាំងអស់គ្នា »។

យ៉ាងណាមិញ ដោយសារតែប្រជាប្រិយភាពរបស់ក្រុម BTS​ ក៏ដូចជាការផ្សព្វផ្សាយរបស់ក្រុមសិស្សច្បងផង ទើបធ្វើឲ្យក្រុមបុរសថ្មីឈ្មោះ TXT នេះមានអ្នកគាំទ្រ BTS ក៏ដូចជាអ្នកគាំទ្រចម្រៀង Kpop ដទៃទៀតជាច្រើន ទន្ទឹងរង់ចាំការបង្ហាញខ្លួនជាផ្លូវការរបស់ពួកគេ៕