ការបាញ់សារធាតុសម្លាប់មេរោគ​ ឫទឹកសម្លាប់មេរោគ​ ឫអាល់កុល​ លើសរីរាង្គកាយរបស់មនុស្ស​ គឺមិន​អាច​​ជួយ​ប្រឆាំងនឹង​វីរុស​កូវីដ-១៩​ បានឡើយ ផ្ទុយទៅវិញវាអាចបណ្តាល ឲ្យមានគ្រោះ​ថ្នាក់ដល់សុខ​ភាព​​មនុស្ស​បាន​។ នេះបើយោងតាមអត្ថបទបកប្រែ ក្រៅផ្លូវការជាភាសាអង់គ្លេស របស់អង្គការ​សុខ​ភាព​​ពិភពលោក ដែលក្រសួង​សុខាភិបាល នៃព្រះរាជាណាចក្រកម្ពុជា លើកយកមកផ្សព្វផ្សាយ នៅ​ថ្ងៃ​ទី២២ ខែធ្នូនេះ។

ជាមួយគ្នានេះ រដ្ឋលេខាធិការ និងជាអ្នកនាំពាក្យក្រសួងសុខាភិបាលកម្ពុជា លោកស្រី ឱ វណ្ណឌីន កាលពីថ្ងៃទី២២ ខែធ្នូនេះ បានលើកយកអត្ថបទបកប្រែក្រៅផ្លូវការ ពីអត្ថបទភាសាអង់គ្លេស របស់អង្គការសុខភាពពិភពលោក ខាងលើនេះ យកមកធ្វើការផ្សព្វផ្សាយ ដោយបញ្ជាក់ពីការពន្យល់ចំពោះរឿងនេះ។

យោងតាមការពន្យល់ណែនាំរបស់អង្គការសុខភាពពិភពលោក តាំងពីថ្ងៃទី២៧ ខែមេសា ឆ្នាំ២០២០ បានបង្ហាញថា ការបាញ់អាល់កុល ឬថ្នាំសម្លាប់មេរោគ ឬសារធាតុសម្លាប់មេរោគ លើសរីរាង្គមនុស្ស មិនបានជួយដល់ការការពារខ្លួន លោកអ្នកប្រឆាំងនឹងវីរុសកូវីដ១៩ នោះឡើយ នឹងអាចធ្វើឱ្យមានគ្រោះថ្នាក់ដល់សុខភាពលោកអ្នកទៀតផង។

លើសពីនេះ អង្គការសុខភាពពិភពលោក ក៏បានបញ្ជាក់ដែរថា មិនត្រូវបាញ់ថ្នាំសម្លាប់មេរោគ ឬ អាល់កុល ឬសារធាតុសម្លាប់មេរោគ ទៅលើខ្លួនមនុស្ស នៅគ្រប់កាលៈទេសៈ។

សារធាតុទាំងនេះ អាចធ្វើឱ្យពុល ប្រសិនបើប៉ះមាត់ ហើយលេបចូលទៅ អាចធ្វើឱ្យរំខាន រមាស់ ឬរលាកអាល់ឡែកហ្ស៊ីស្បែក ធ្វើឱ្យខូចស្បែក និងភ្នែករបស់មនុស្ស។

ថ្នាំសម្លាប់មេរោគ ឬសារធាតុ សម្លាប់មេរោគ ត្រូវប្រើប្រាស់ដោយប្រុងប្រយ័ត្ន សម្រាប់លាងសម្អាតផ្ទៃទីកន្លែងណាមួយតែប៉ុណ្ណោះ។

ត្រូវចងចាំការរក្សាសារធាតុគ្លរីន ឬសារធាតុសម្លាប់មេរោគផ្សេងទៀតឱ្យឆ្ងាយ និងផុតពីដៃក្មេង ប្រយ័ត្នគ្រោះថ្នាក់។

សូមកត់សម្គាល់ថា អាល់កុល ឬជែល អាចប្រើសម្រាប់សម្អាតដៃ របស់មនុស្សពីភាពក្រខ្វក់ ដែលមានជាប់មេរោគនៅលើដៃ តែមិនត្រូវប្រើសម្រាប់បាញ់លើខ្លួនប្រាណឡើយ៕​ ដោយ៖ ឃួន លក្ខិណា