ភ្នំពេញ៖ លោក Jean Francois Brulet សកលវិទ្យាធិការសាកលវិទ្យាល័យ លីមកុកវីង បានសម្ដែងការអបអរសាទរ ចំពោះការប្រកាសត្រៀមបើកដំណើរការគ្រឹះស្ថានអប់រំគ្រប់កម្រិត នៅទូទាំងប្រទេសកម្ពុជាឡើងវិញ ចាប់ពីថ្ងៃទី០១ ខែវិច្ឆិកា ឆ្នាំ២០២១ខាងមុខនេះ។

លោក Jean Francois Brulet លើកឡើងដូចនេះ ក្នុងកម្មវិធី «ទិវាស្ថាបនិកអន្ដរជាតិ» ដែលសាកលវិទ្យាល័យ លីមកុកវីង បានរៀបចំនៅថ្ងៃទី២២ ខែតុលា ដើម្បីរំឮកវិញ្ញាណក្ខន្ធ និងការដឹងគុណចំពោះប្រធានក្រុមប្រឹក្សាភិបាបាល និងជាស្ថាបនិកនៃសាកលវិទ្យាល័យរបស់ខ្លួន គឺលោក តាន់ស្រ៊ី លីមកុកវីង ដែលបានទទួលមរណភាពកាលពី ១ឆ្នាំមុន ។

លោកបានបន្ដថា លោកពិតជាសប្បាយចិត្ត ដែលក្រសួងអប់រំ អនុញ្ញាតឲ្យបើកដំណើរការសាលារៀនឡើងវិញ ហើយសាកលវិទ្យាល័យរបស់ខ្លួន ក៏ត្រៀមខ្លួនរួចរាល់ ក្នុងការបើកដំណើរការ តាមគន្លងថ្មី ក្នុងបរិបទកូវីដ-១៩ ផងដែរ ដើម្បីផ្ដល់ភាពងាយស្រួលដល់ការសិក្សារបស់និស្សិត ដោយមានការបែងចែងទាំងការសិក្សាផ្ទាល់ និងការសិក្សាតាម Online ។

សូមជម្រាបថា ទន្ទឹមនឹងការរៀបចំទិវាស្ថាបនិកអន្ដរជាតិនេះ សាកលវិទ្យាល័យ លីមកុកវីង បានប្រកាសផ្ដល់អាហារូបករណ៍សិក្សា ១០០% ចំនួន ៥០ កន្លែង ដល់ក្រសួងសុខាភិបាល, ក្រសួងអប់រំ យុវជន និងកីឡា រួមទាំងស្ថាប័នអង្គការសប្បុរសធម៌ជាច្រើន ពិសេសក៏មានការផ្ដល់អាហារូបករណ៍ដល់សិស្ស ដែលមានឪពុកម្ដាយជាគ្រូពេទ្យស្ម័គ្រចិត្តក្នុងការខិតខំប្រឹងប្រែងប្រយុទ្ធប្រឆាំងជំងឺកូវីដ-១៩ ជាមួយរាជរដ្ឋាភិបាលកម្ពុជាទៀតផង ៕