សម្តេចហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃនេះ បានពន្យល់ពីហេតុផលដែលនាំប្តី​និងប្រពន្ធ​មិន​អាចឈ្លោះគ្នាបាន ពាក់ព័ន្ធនឹងរឿងចូលខារ៉ាអូខេ។

ភ្ជាប់ន័យនេះ ស​ម្តេចនាយករដ្ឋមន្ត្រីបានលើកឡើងថា ឥឡូវនេះស្ថានភាពនៃជំងឺកូវីដ១៩ បានធូរ ស្បើយ ឡើងវិញហើយ កម្ពុជាក៏បើកប្រទេសឡើងវិញដែរ រីឯអាជីវកម្មក្លឹបកម្សាន្ត ខារ៉ាអូខេ ក៏​បើក​ឡើង​វិញ​ដែរ ដូច្នេះដើម្បីបង្កាកុំឱ្យប្តីប្រពន្ធឈ្លោះគ្នាដោយសាររឿងចូលខារ៉ាអូខេ ដូច្នេះបុរសៗ​គួរ​យក​ប្រពន្ធ​ចូល​ខារ៉ាអូខេជាមួយដែរ។

សម្តេចហ៊ុន សែនមានប្រសាសន៍ថា៖«ដើម្បីជៀសវាងប្រពន្ធខឹងដល់ទាំងខ្ញុំ បុរសៗគួរយកប្រពន្ធទៅជា​មួយ​គ្នា បើរៀនអានអក្សរត្រូវរៀនជាមួយគ្នាទៅ យ៉ាងម្តេចដែរតើអាចធ្វើបានទេខាងបុរសៗ។ បើ​សិន​ជា​ទៅតែម្នាក់ឯងនៅពេលមកវិញច្បាស់ជាត្រូវប្រពន្ធជេរ ហើយថាដោយទាំងខ្ញុំ គឺមកពី​សម្តេច​បើកខារ៉ា​អូខេ ទើបប្តីខ្ញុំខូច ដូច្នេះសូមផ្តាំទៅបុរសទាំងឡាយ ត្រូវនាំប្រពន្ធនិងកូនៗទៅជាមួយទៅ ដើម្បី​សប្បាយទាំងអស់គ្នា»។

សូមបញ្ជាក់ថា បន្ទាប់ពីមានការចាក់វ៉ាក់សាំងដូសទី១ ទី២ និងទី៣ រួចមក សម្តេចហ៊ុនសែន បាន​ប្រកាស ឱ្យមានការបើកប្រទេសឡើងវិញផងដែរ ហើយវិស័យផ្សេងៗក៏ត្រូវប្រកាសបើកដំណើរការ​ឡើង​វិញ ក្នុងនោះវិស័យអាជីវកម្មក្លឹបកម្សាន្ត ឌីស្កូតេក និងខារ៉ាអូខេ ក៏ត្រូវបើកយ៉ាងពេញលេញ គិតមកដល់ពេលបច្ចុប្បន្ននេះ៕ ដោយ៖ ឃួន លក្ខិណា