បើគេនិយាយពីសំណង់បេតិកភណ្ឌនៅខេត្តបន្ទាយមានជ័យ គេមិនអាចបំភ្លេចបានទេនូវស្រុកព្រះនេត្រព្រះ ដោយទីនោះសំបូរទៅដោយវត្តអារាមបុរាណអាយុកាលរាប់រយឆ្នាំ​ បន្ថែមពីនោះគឺប្រាសាទថ្ម ដែលនៅរក្សារូបរាងបានល្អជាច្រើនសង់ក្នុងសម័យមហានគរ។ 

ឧទាហរណ៍ជាក់ស្ដែងគឺប្រាសាទប្រាំនេះតែម្ដង។ ប្រាសាទប្រាំ មានទីតាំងនៅភូមិគោកទាម ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ មានចម្ងាយប្រហែល៧គមពីទីរួមស្រុកក្រឡាញ់ ខេត្តសៀមរាប។ ប្រាសាទនេះស្ថាបនាអំពីភក់ព័ណ៌ឈាមជ្រូក (ក្រហមក្រម៉ៅ) មានតួប៉មបីសង់តម្រៀបគ្នាជើងត្បូងអំពីឥដ្ឋដុត។

មានក្លោងទ្វារសង់អំពីថ្មភក់ បែរមុខទៅរកទិសខាងកើត ហើយនៅសង្ខាងនៃតួប៉មខាងមុខមានបណ្ណាល័យចំនួនពីរសាងអំពីថ្មភក់ពណ៌​ឈាមជ្រូក​ ហ៊ុំព័ទ្ធទៅដោយកំពែងថ្មបាយក្រៀម និងគូរទឹកព័ទ្ធក្រៅប្រហែល១០០ម៉ែត្របួនជ្រុងស្មើ។ យោងតាម Discovery Khmer Temples ការពិនិត្យលើទ្រង់ទ្រាយ សំណង់ហិណ្ឌូមួយនេះគឺសាងសង់នាសតវត្សទី១១ ដោយព្រាហ្មណ៏ណាម្នាក់នៃព្រះបាទជ័យវរ្ម័នទី៥ និង ជ័យវីរៈវរ្ម័នដើម្បីឧទ្ទិសថ្វាយទេពនិកាយត្រីមូ៌តិ៕