គិតមកដល់ពេលនេះ សមត្ថកិច្ច២នាក់បានស្លាប់ និងម្នាក់ទៀតបានរបួសធ្ងន់ ក្នុងប្រតិបត្តិការបង្ក្រាបគ្រឿងញៀននៅស្រុកអង្គស្នួល​នារសៀលនេះ។

ប្រភពព័ត៌មានពីសមត្ថកិច្ចស្រុកអង្គស្នួលបានឲ្យដឹងថា សមត្ថកិច្ច២នាក់បានស្លាប់ (ក្នុងនោះមានម្នាក់ជាមេប៉ុស្តី៍ទួលព្រិច និងមន្ត្រីប៉ូលិសម្នាក់) និងមន្រ្តីប៉លិសម្នាក់ទៀតរងរបួស ក្នុងប្រតិបត្តិការចុះបង្ក្រាបករណីគ្រឿងញៀន ហើយត្រូវបានជនសង្ស័យបាញ់​តដៃ។ ករណីនេះ បានកើតឡើងនៅរសៀល ថ្ងៃទី ២១ ខែ មេសា ឆ្នាំ ២០២២ នេះ ស្ថិតក្នុងឃុំទួលព្រិច ស្រុកអង្គស្នួល ខេត្តកណ្តាល។

យោងតាមអាខោនហ្វេសប៊ុក របស់កីឡាករ រឿង សោភ័ណ្ឌ បានឱ្យដឹងថា ប្អូនប្រុសក្រោកឡើងបងទទួលយកមិនបានទេហេតុអីបានជាប្អូនអាយុខ្លីម្លេះ ប្អូនបាត់បងជីវិតដោយសារចុះបង្ក្រាបគ្រឿងញៀននៅស្រុកអង្គស្នួល ហើយប្អូនទើបនឹងការហើយមិនទាន់បានមួយខែផង សូមវិញ្ញាណក្ខន្ធប្អូនទៅដល់ទីបារម្ភសុខកុំឲ្យអាយុខ្លីដូចជាតិនេះ។

ក្រោយប្រតិបត្តិការចុះបង្ក្រាប ជនសង្ស័យត្រូវបានកម្លាំងសមត្ថកិច្ចបាញ់ត្រូវ បណ្ដាលឲ្យរងរបួសធ្ងន់ និងធ្វើការឃាត់ខ្លួនជនសង្ស័យបានម្នាក់។

សមត្ថកិច្ចបន្តទៀតថា នាយនគរបាលដែលត្រូវមុខសញ្ញាគ្រឿងញៀន បាញ់បណ្តាលឱ្យស្លាប់នោះ មានតួនាទីជាមេប៉ុស្តិ៍ឃុំទួលព្រិច ស្រុកអង្គស្នូល និងម្នាក់ទៀតជាមន្រ្តីជំនាញគ្រឿងញៀន៕ ដោយ៖ ឃួន លក្ខិណា