ផ្លែម្រះត្រូវបានគេស្គាល់ថាជាបន្លែផ្លែដែលមានរសជាតិល្វីង។ ម្រះគឺជារុក្ខជាតិវល្លិត្រូពិចដែលស្ថិតក្នុងគ្រួសារCucurbitaceae និងមានទំនាក់ទំនងយ៉ាងជិតស្និទ្ធជាមួយល្ពៅ និងត្រសក់។ វាត្រូវបានគេដាំដុះនៅជុំវិញពិភពលោក ហើយផ្លែរបស់វា ត្រូវបានគេប្រើប្រាស់នៅក្នុងម្ហូបអាស៊ីជាច្រើនប្រភេទ។ នេះបើយោងតាម https://spiencambodia.com/ ។

ខាងក្រោមនេះគឺជាអត្ថប្រយោជន៍ទាំង ៥ របស់ផ្លែម្រះ

១. ផ្ទុកជាមួយនូវសារធាតុចិញ្ចឹមសំខាន់ៗមួយចំនួន

ផ្លែម្រះគឺជាប្រភពដ៏អស្ចារ្យនៃសារធាតុចិញ្ចឹមសំខាន់ៗជាច្រើន។ ផ្លែម្រះឆៅ ៩៤ ក្រាម ផ្តល់ជូននូវ ២០កាឡូរី កាបូនអ៊ីដ្រាត ៤ ក្រាម ជាតិសរសៃ ២ ក្រាម វីតាមីនសេ វីតាមីនអា Folate ប៉ូតាស្យូម ស័ង្កសី និងជាតិដែក។ ផ្លែម្រះមានវីតាមីនA ខ្ពស់ដែលជាវីតាមីនជួយលើកកម្ពស់សុខភាពស្បែក និងភ្នែកបានល្អប្រសើរ។

២. អាចជួយកាត់បន្ថយជាតិស្ករក្នុងឈាម

ដោយសារលក្ខណៈសម្បត្តិឱសថដ៏មានឥទ្ធិពលរបស់វា ម្រះត្រូវបានប្រើប្រាស់ជាយូរមកហើយនៅជុំវិញពិភពលោកក្នុងការព្យាបាលជំងឺទាក់ទងនឹងជំងឺទឹកនោមផ្អែម។ ក្នុងប៉ុន្មានឆ្នាំថ្មីៗនេះការសិក្សាជាច្រើនបានបញ្ជាក់ពីតួនាទីរបស់ផ្លែម្រះក្នុងការគ្រប់គ្រងជាតិស្ករក្នុងឈាម។ ការសិក្សារយៈពេល ៣ ខែលើមនុស្សពេញវ័យចំនួន ២៤ នាក់ដែលមានជំងឺទឹកនោមផ្អែមបានបង្ហាញថាការទទួលទានផ្លែម្រះ ២០០០ មីលីក្រាមជារៀងរាល់ថ្ងៃបានថយចុះជាតិស្ករក្នុងឈាម និងអេម៉ូក្លូប៊ីន A1c ដែលជាតេស្តប្រើដើម្បីវាស់ជាតិស្ករក្នុងឈាមក្នុងរយៈពេល ៣ ខែ។

៣. អាចមានលក្ខណៈសម្បត្តិប្រឆាំងនឹងជំងឺមហារីក

ការស្រាវជ្រាវបានបង្ហាញថា ផ្លែម្រះមានផ្ទុកសមាសធាតុមួយចំនួនដែលមានលក្ខណៈប្រឆាំងនឹងជំងឺមហារីក។ ការសិក្សាសាកល្បងមួយបានបង្ហាញថាសារធាតុដែលចម្រាញ់ចេញពីផ្លែម្រះមានប្រសិទ្ធិភាពក្នុងការសម្លាប់កោសិកាមហារីកក្រពះពោះវៀនសួត និងច្រមុះ (តំបន់ដែលមានទីតាំងនៅពីក្រោយច្រមុះនៅផ្នែកខាងក្រោយនៃបំពង់ករបស់អ្នក)។

៤. អាចបន្ថយកម្រិតកូឡេស្តេរ៉ុល

កម្រិតកូឡេស្តេរ៉ុលខ្ពស់អាចបណ្តាលឱ្យបន្ទះខ្លាញ់បង្កើតឡើងនៅក្នុងសរសៃឈាមរបស់អ្នកបង្ខំឱ្យបេះដូងរបស់អ្នកខិតខំប្រឹងប្រែងដើម្បីបូមឈាម និងបង្កើនហានិភ័យនៃជំងឺបេះដូង។ ការសិក្សាពីសត្វជាច្រើនបានរកឃើញថាផ្លែម្រះអាចបន្ថយកម្រិតកូលេស្តេរ៉ុលដើម្បីគាំទ្រដល់សុខភាពទូទៅរបស់បេះដូង។

៥. ជួយបញ្ចុះទម្ងន់

ផ្លែម្រះអាចជួយសម្រកទម្ងន់ព្រោះវាមានកាឡូរីទាបប៉ុន្តែមានជាតិសរសៃខ្ពស់។ វាមានផ្ទុកជាតិសរសៃប្រហែល ២ ក្រាមក្នុងផ្លែម្រះ ៩៤ ក្រាម។ ជាតិសរសៃឆ្លងកាត់បំពង់រំលាយអាហាររបស់អ្នកយឺត ៗ ជួយធ្វើឱ្យអ្នកឆ្អែតកាន់តែយូរ និងកាត់បន្ថយភាពឃ្លាន និងចំណង់អាហារ។ ដូច្នេះការផ្លាស់ប្តូរគ្រឿងផ្សំដែលមានកាឡូរីខ្ពស់ជាមួយនឹងផ្លែម្រះអាចជួយបង្កើនការញ៉ាំជាតិសរសៃរបស់អ្នក និងកាត់បន្ថយកាឡូរីដើម្បីលើកកម្ពស់ការសម្រកទម្ងន់៕ ប្រែសម្រួលដោយ៖ ចិនចាវ