បច្ចុប្បន្ននេះកូនខ្មែរមួយចំនួនពេញនិយមខ្លាំងលើការចាប់ដៃនៅពេលពួកគេជួបគ្នា និងជម្រាបលាគ្នា។ តាមពិតទៅវាមិនមែនជាបញ្ហាអាក្រក់អ្វីនោះទេប៉ុន្តែវប្បធម៌នៃការចាប់ដៃនេះវាមិនមែនជាវប្បធម៌ដើមកំណើតរបស់ខ្មែរឡើយ ។

រូបតំណាង

មានតែការសំពះទេទើបជាវប្បធម៌ដើមកំណើតរបស់ខ្មែរប៉ុន្តែកូនខ្មែរមួយចំនួនមិនព្រមយកវប្បធម៌ខ្លួនមកអនុវត្តឡើយ ម្នាក់ៗបែរជាពេញនិយមតែការចាប់ដៃទៅវិញ ដែលអាចធ្វើឲ្យវប្បធម៌នៃការសំពះរបស់ខ្មែរត្រូវបាត់បង់ក៏ថាបាន។មានបុគ្គលមួយចំនួនយល់ថា ការចាប់ដៃនៅពេលជួបគ្នា ឬសំពះនៅពេលជួបអ្នកធំអ្នកមានបុណ្យសក្តិ មានកិត្តិយសជាការគួរសមមួយ ប្រសើរជាងការសំពះ។

រូបតំណាង

អ្នកដែលយល់ឃើញបែបនេះមានន័យថា ពួកគេជាមនុស្សដែលមិនឲ្យតម្លៃលើវប្បធម៌ខ្លួនឯង ហើយយកវប្បធម៌អ្នកដទៃមកសង្កត់លើវប្បធម៌ខ្លួនឯងដែលធ្វើឱ្យវប្បធម៌ខ្លួនឯងត្រូវបោះបង់។អ្នកមិនដឹងទេថា ប្រសិនបើអ្នកបោះបង់ការសំពះពីពេលនេះបន្តិចម្ដងៗនោះកូនខ្មែរជំនាន់ក្រោយប្រាកដជាលែងមានការសំពះទៀតហើយ ពួកគេនឹងប្តូរមកការចាប់ដៃជំនួសវិញ។ ពួកយើងម្នាក់ៗមានតួនាទីជាអ្នកការពារ ថែរក្សានូវវប្បធម៌ជាតិ កេតនភ័ណ្ឌជាតិ និងអរិយធម៌ជាតិ ដូច្នេះយើងម្នាក់ៗត្រូវតែអនុវត្តនូវអ្វីដែលជាវប្បធម៌របស់ខ្លួនឯងឱ្យបានច្រើនជាងវប្បធម៌ដែលហូរចូលមកពីខាងក្រៅ៕

អត្ថបទដើមដោយ ៖ ឈុនឡេង