មនុស្សយើងកើតមកតែងតែមានស្នេហា និងការស្រឡាញ់គ្រប់ៗគ្នា គ្មាននរណាម្នាក់ដែលរស់នៅដោយគ្មានស្នេហា ឬការស្រលាញ់បានទេ ប៉ុន្តែយើងត្រូវដឹងថាវ័យណាមួយដែលគួរមានស្នេហា ហើយវ័យណាមួយដែលមិនគួរមានស្នេហា។ វ័យណាក៏យើងអាចមានស្នេហាបានដែរឲ្យតែយើងដឹងក្តី ដឹងខុសត្រូវ ចេះគិតគិតពិចារណាបានជ្រៅជ្រះ។ មានសំណួរមួយដែលតែងតែសួរទៅកាន់យុវជនដែលស្ថិតនៅក្នុងវ័យសិក្សាថា តើការមានស្នេហាក្នុងវ័យសិក្សាវាជារឿងខុសដែរឬទេ?

រូបតំណាង

ចម្លើយនោះគឺ វាមិនខុសនោះទេបើគ្រាន់តែមានស្នេហាក្នុងវ័យសិក្សា ប៉ុន្តែវាក៏មិនត្រូវដែរបើយើងយកស្នេហាធំជាងការសិក្សានោះ។ រឿងស្នេហាវាស្ថិតលើយើងជាអ្នកកំណត់ដោយខ្លួនឯង មិនមែនស្ថិតលើវ័យដែលយើងគួរតែមាននោះទេ ប៉ុន្តែយើងត្រូវគិតថា បើយើងមានស្នេហាក្នុងវ័យសិក្សាតើវាផ្ដល់ផលប្រយោជន៍អ្វីខ្លះដល់យើង?

បើយើងមានស្នេហាក្នុងគោលបំណងឱ្យការសិក្សាកាន់តែរីកចម្រើននោះវាជារឿងល្អបំផុត ប៉ុន្តែបើអ្នកគិតតែពីរឿងស្នេហាដោយភ្លេចការសិក្សា នោះស្នេហានឹងបំផ្លាញការសិក្សារបស់អ្នកហើយវាក៏បំផ្លាញអនាគតរបស់អ្នកដូចគ្នា។ យុវជនភាគច្រើនមិនបានយកស្នេហាមកជាប្រយោជន៍ក្នុងការសិក្សានោះទេ ពួកគេតែងតែយកស្នេហាជាការស្រលាញ់ទៅវិញដែលវាប៉ះពាល់ដល់ការសិក្សាយ៉ាងខ្លាំង។ ដូច្នេះហើយការមានស្នេហានៅពេលសិក្សាវាមានផលល្អនិងផលអាក្រក់ម្យ៉ាងម្នាក់ គឺវាអាស្រ័យលើបុគ្គលផ្ទាល់ខ្លួនប៉ុណ្ណោះ៕

អត្ថបទដើមដោយ ៖ ឈុនឡេង