សុខភាព៖ ពេលមករដូវយើងអាចទទួលទានទឹកដូងបានធម្មតា សមាសធាតុផ្សំនៅក្នុងទឹកដូងមានជាតិទឹក សារធាតុរ៉ែ និងវីតាមីន ដើម្បីជួយបំពេញជាតិទឹក និងបង្កើនថាមពលហើយជួយអោយស្រស់ស្រាយថែមទៀតផង។ នេះបើយោងតាមHello Krupet។ 

ទឹកដូងល្អបំផុតសម្រាប់ស្ត្រីកំឡុងពេលមករដូវ ពេលមករដូវស្បែកយើងនឹងរាងកាយ គឺខ្សះជាតិទឹក ខ្សោយថាមពល ដែលទឹកដូងជួយដោះស្រាយបញ្ហាទាំងនោះបាន មិនដូចអ្វីដែលយើងធ្លាប់លឺថា ហាមទទួលទានទឹកដូងកំឡុងពេលមករដូវទេ។ ផ្ទុយទៅវិញ អ្នកមិនគួរទទួលទានជាតិស្រវឹង រឺស្រាឡើយពេលមករដូវ គ្មានស្រាក្រហមណាធ្វើអោយរដូវមកស្រួលទេ។

ខាងក្រោមនេះជាហេតុផលធំៗ ៣យ៉ាង ដែលមនុស្សស្រីគួរទទួលទានទឹកដូងអំឡុងពេលមករដូវ៖

១. កាត់បន្ថយការឈឺចាប់ពេលមករដូវ

ពិតណាស់ទឹកដូងអាចជួយរដូវមកលឿន ដែលស័ក្តិសមសម្រាប់ស្រីៗយើង ដែលមករដូវមិនទៀងទាត់។ ក្រៅពីនេះ ទឹកដូងក៏អាចជួយកាត់បន្ថយការឈឺចាប់ពេលមករដូវ ព្រមទាំងកម្ចាត់បញ្ហាកំណក់ឈាម ដោយសារតែភេសជ្ជៈមួយនេះសម្បូរទៅដោយវីតាមីន និងសារធាតុរ៉ែសំខាន់ៗ។

២. ដោះស្រាយបញ្ហារាំងរដូវ

យោងតាមគេហទំព័រHello គ្រូពេទ្យ បានឲ្យដឹងថា ជាមួយនឹងសារធាតុចិញ្ចឹមជាច្រើននៅក្នុងភេសជ្ជៈមួយនេះ ដែលរួមមានវីតាមីន ម៉ាញេស្យូម ប៉ូតាស្យូម កាល់ស្យូម ម៉ង់កាណែស និងសារធាតុប្រឆាំងនឹងអុកស៊ីតកម្មធ្វើឲ្យទឹកដូងមានសមត្ថភាពក្នុងការបង្កើតគ្រាប់ឈាមបានយ៉ាងអស្ចារ្យ។ ពេលខ្លះនៅពេលដែលមករដូវច្រើនជ្រុលគ្នាយើងអាចប្រឈមនឹងការរាំងរដូវ ហេតុនេះហើយទើបអ្នកជំនាញណែនាំឲ្យញ៉ាំទឹកដូង ដើម្បីកាត់បន្ថយបញ្ហាប្រឈមទាំងនេះ។

៣. ជួយឲ្យរដូវមកស្រួល

ស្រីៗយើងតែងជួបប្រទះបញ្ហាផ្សេងៗគ្នា អំឡុងពេលនៃវដ្ដរដូវ។ ប៉ុន្តែទឹកដូងអាចធានាឲ្យយើងមករដូវដោយរលូន និងមិនឈឺចាប់។ ជាងនេះទៅទៀតទឹកដូងក៏សម្បូរទៅដោយសារធាតុអេឡិចត្រូលីត ដែលអាចជួយរក្សាជាតិទឹក រក្សាថាមពលរាងកាយ ក៏ដូចជាជួយជំរុញលំហូរឈាមអំឡុងពេលមករដូវ ថែមទៀតផង៕