ភ្នំពេញ៖ ផ្លូវល្បឿនលឿនភ្នំពេញ-បាវិត នឹងត្រូវបើកការដ្ឋានសាងសង់ នៅថ្ងៃទី៧ មិថុនា ២០២៣ ក្រោមអធិបតីភាពសម្តេច ហ៊ុន សែន នាយករដ្ឋមន្ត្រីកម្ពុជា។ នេះបើតាមក្រសួងសាធារណការ និងដឹកជញ្ជូន នាថ្ងៃទី២១ ខែមេសា ឆ្នាំ២០២៣។

គម្រោងផ្លូវល្បឿនលឿនភ្នំពេញ-បាវិតនេះនឹងឆ្លងកាត់ខេត្ត​ចំនួន​ ៣ គឺកាត់ចេញពី​រាជធានី​ភ្នំពេញ​ត្រង់ចំណុច​ផ្លូវ​ក្រវាត់​ក្រុង​ទី​៣ កាត់​តាម​ខេត្តកណ្តាល ខេត្តព្រៃវែង និង​ខេត្តស្វាយរៀង ឆ្ពោះទៅ​ក្រុង​បាវិតព្រំដែន​កម្ពុជា​-​វៀតណាម​។គម្រោង​ហេដ្ឋារចនាសម្ព័ន្ធ​ផ្លូវ​ល្បឿន​លឿន​ភ្នំពេញ​-​បាវិត​ ​ដែលជា​ផ្លូវ​ល្បឿន​លឿនទី​២ របស់​កម្ពុជា បន្ទាប់ពី​ផ្លូវ​ល្បឿន​លឿន​ភ្នំ​ពេញ​-​ព្រះសីហនុ​ ​គឺជា​ខ្សែ​ផ្លូវ​ថ្មី​ទាំងស្រុងមាន​ប្រវែង​សរុប​ប្រមាណ​ជា​ ១៣៨​ គ​.​ម​។

គម្រោង​នេះគ្រោង​នឹង​បញ្ចប់​ការសាងសង់​ឱ្យ​រួចរាល់​នៅ​ដំណាច់ឆ្នាំ​២០២៦ ឬ​ដើមឆ្នាំ ​២០២៧ ដោយ​ត្រូវ​ចំណាយ​ថវិកា​សាងសង់​សរុប​ប្រមាណ​ ១៦៣៨​លាន​ដុល្លារ​អាមេរិក​។ គម្រោង​ផ្លូវ​ល្បឿន​លឿន​នេះ ត្រូវបាន​រដ្ឋា​ភិ​បាល​ចាត់ទុកថា មាន​សារៈសំខាន់​ណាស់​ក្នុង​ការតភ្ជាប់​ទាំង​ប្រទេស​ចិន មក​ភូមា ថៃ កម្ពុជា និង​ទៅ​វៀតណាម​ថែមទៀត៕