ខេត្តកណ្តាល ៖ សមត្ថកិច្ចដែលកំពុងយាមល្បាតតាមគោលដៅនៅចំណុចផ្សារថ្នល់ទទឹង នៃឃុំដំណាក់អំពិល កាលពីវេលាម៉ោងប្រមាណ១១យប់ ថ្ងៃទី២០ ខែមីនា បានប្រទះឃេីញបុរសម្នាក់ បីកូនផង និងឲ្យកូនជិះកផង ដោយធ្វើដំណើរថ្នើជើងទៅស្រុកអង្គស្នួល។ ដោយឃើញគួរឲ្យអាណិតពេក សមត្ថកិច្ចក៏សម្រេចយករថយន្តស៊ីរ៉ែន ជូនបុរសរូបនោះ និងកូនៗទៅផ្ទះតែម្តង។

តាមការបញ្ជាក់ពីបងប្រុសម្នាក់ ដែលមានគណនីហ្វេសប៊ុកឈ្មោះ Heng Vechea បានធ្វេីការរៀបរាប់ទាំងអារម្មណ៍ក្ដុកក្ដួល ថា៖ «ម៉ោងជិត ១១ហេីយ បងអេីយបង ហេតុតែស្រលាញ់កូន បី១ ជិះក១ ដេីរតាំងពីថ្នល់ទទឹង ទៅអង្គស្នួល ឃេីញអាណិតយករថយន្តសុីរ៉ែនជូនទៅដល់ផ្ទះ នឹកកាលខ្ញុំនៅតូច មិនមានម៉ូតូឡានដូចឥឡូវ ខ្ញុំតែងតែជិះកពូ ដេីរតាំងពីស្វាយឧត្តម ដល់អង្គស្នួល»។

ទង្វើដ៏ល្អរបស់សមត្ថកិច្ចនេះ បានធ្វើឲ្យមានការគាំទ្រយ៉ាងខ្លាំងពីសំណាក់មហាជន ចំពោះសមត្ថកិច្ចដែលចិត្តល្អជួយទុក្ខលំបាករបស់ប្រជាពលរដ្ឋ៕ យឺត ភារ៉ា