សារមន្ទីរប្រវត្តិសាស្ត្របាត់ដំបង មានអាយុកាល១១៨ឆ្នាំហើយ គិតត្រឹមឆ្នាំ២០២៣ នេះ ហើយក៏ជាអតីតសាលាខេត្តបាត់ដំបងផងដែរ។សារមន្ទីរនេះត្រូវបានរចនាដោយស្ថាបត្យករជនជាតិអ៊ីតាលី អគារបេតិកភណ្ឌនេះត្រូវបានសាងសង់ឡើងក្នុងឆ្នាំ 1905 ជាកន្លែងស្នាក់នៅរបស់អតីតអភិបាលខេត្ត លោកជំទាវ កថា ថន ឈុំ ពេលដែលខេត្តបាត់ដំបងស្ថិតនៅក្រោមការគ្រប់គ្រងរបស់សៀម។លោកជំទាវ កថា ថន ឈុំ ជាសមាជិកនៃគ្រួសារបៀន (ផ្ទះអបៃវង្ស) ដែលគ្រួសារនោះគ្រប់គ្រងខេត្តបាត់ដំបងអស់ប្រាំមួយជំនាន់។ 

បន្ទាប់ពីការប្រគល់ខេត្តបាត់ដំបងមកឱ្យកម្ពុជាវិញតាមរយៈសន្ធិសញ្ញាបារាំង-សៀមឆ្នាំ ១៩០៧ អគារនេះបានក្លាយជាសាលាខេត្តសម្រាប់ខេត្តបាត់ដំបងរហូតដល់ឆ្នាំ ២០០៥។បច្ចុប្បន្ន អគារបេតិកភណ្ឌដ៏មានវ័យចំណាស់មួយនេះគឺជាសារមន្ទីរប្រវត្តិសាស្ត្របាត់ដំបង ដែលភ្ញៀវទេសចរអាចដឹងគុណចំពោះអគារប្រវត្តិសាស្ត្រនេះ ឧបករណ៍ភ្លេងបុរាណ ប្រវត្តិរបស់អភិបាលខេត្តបាត់ដំបង និងរូបគំនូរសិល្បករល្បីៗដែលមានកំណើតនៅខេត្តបាត់ដំបង។

ជាមួយនឹងការថែរក្សា និងធ្វើការអភិរក្សរបស់ក្រសួងវប្បធម៌ និងវិចិត្រសិល្បៈ និងអាជ្ញាធរដែនដីនោះ សារមន្ទីរនេះក៏ត្រូវបានបើកឱ្យភ្ញៀវទេសចរជាតិ និងអន្តរជាតិចូលទស្សនាជារៀងរាល់ថ្ងៃផងដែរ ។ដោយតម្លៃសំបុត្រសម្រាប់ភ្ញៀវទេសចរជាតិចូលទស្សនាគឺមានតម្លៃ ១០០០រៀលក្នុងម្នាក់។ហើយតម្លៃសំបុត្រ សម្រាប់ភ្ញៀវទេសចរអន្តរជាតិវិញ មានតម្លៃ ១២ ០០០រៀលក្នុងម្នាក់ ។

បើតាមមន្ត្រីដែលប្រចាំការនៅសារមន្ទីរនេះ បានឱ្យដឹងថា រាល់ថ្ងៃនេះមានភ្ញៀវទេសចរជាតិ និងអន្តរជាតិចូលទស្សនាសម្បត្តិបេតិកភណ្ឌជាតិដ៏ចំណាស់មួយនេះជាហូរហែរ មិនដែលដាច់ឡើយ ជាពិសេសនៅថ្ងៃចុងសប្តាហ៍ ថ្ងៃសៅរ៍ និងថ្ងៃអាទិត្យមានភ្ញៀវទេចរចូលទស្សនាច្រើនជាងគេ៕