ព្រះសីហនុ៖ កសិដ្ឋានចិញ្ចឹមចៀម និងអូទ្រីស មានទីតាំងស្ថិតនៅភូមិអូរត្រជាក់ចិត្ត ស្រុកព្រៃនប់ ខេត្តព្រះសីហនុ ទំហំ ៣០ហិកតា កំពុងអន្ទងចិត្តភ្ញៀវទៅលេងកម្សាន្តជាហូរហែ ដោយសារតែទីតំាងនោះមានធម្មជាតិស្រស់ស្អាត ដែលផ្សារភ្ជាប់ទៅនឹងកសិទេសចរណ៍។លោក ឃឹម សន ប្រធានក្រុមកសិដ្ឋានចិញ្ចឹមចៀម និងអូទ្រីស បាននិយាយថា «ដំបូងឡើយកសិដ្ឋានមានអូទ្រីស តែ១០០ក្បាល ប៉ុន្តែពេលនេះអូទ្រីសមានជាង ៤០០ក្បាល ហើយមិនតែប៉ុណ្ណោះក៏មានសត្វជាច្រើនទៀត»។

លោក ឃឹម សន បានបញ្ជាក់បន្ថែមថា សម្រាប់ភ្ញៀវទេសចរ ដែលបានធ្វើដំណើរកម្សាន្តទៅលេង ខេត្តព្រះសីហនុ អាចចូលលេងកសិដ្ឋានចិញ្ចឹមចៀម និងអូទ្រីសនេះបាន ព្រោះទីតាំងមានកន្លែងថតរូប មានវាលស្មៅ ដើម្បីថត និងអាចបីកូនចៀមថតរូបបានថែមទៀត។ ប្រសិនបើ សម្រាប់សត្វអូទ្រីស ក៏មានកន្លែងថតនៅក្នុងរោង ហើយភ្ញៀវទេសចរអាចផ្ដល់ជាត្រកួន ឬជាស្មៅ ឲ្យអូទ្រីសសម្រាប់ថតរូបបានផងដែរ៕