ក្រសួងសុខាភិបាល ប្រកាសហាមឃាត់ការចែកចាយ ឬលក់ឱសថ ALPHACIN-Chooy ដែលកំពុងចរាចរលើទីផ្សារកម្ពុជា ដែលគ្មានលេខបញ្ជិកាពីក្រសួងសុខាភិបាល ជាបន្ទាន់ ។ នេះបើយោងតាមសេចក្ដីប្រកាសរបស់ ក្រសួងសុខាភិបាលនៃព្រះរាជាណាចក្រកម្ពុជា កាលពីពេលថ្មីៗនេះ ។

 ក្នុងសេចក្ដីប្រកាសនេះ បានឲ្យដឹងថា យោងតាមច្បាប់ស្តីពីការគ្រប់គ្រងឱសថ និងច្បាប់ស្តីពីវិសោធនកម្ម តម្រូវឱ្យរាល់ការចរាចរឱសថ និងផលិតផលដែលមានគុណភាពក្នុងការបង្ការ ឬព្យាបាលជំងឺគ្រប់ប្រភេទក្នុងប្រទេសកម្ពុជាត្រូវតែមានលេខបញ្ជិកាពីក្រសួងសុខាភិបាល។

លើសពីនេះ ក្រសួងសុខាភិបាល បានថ្កើនរំលឹកដល់ប្រជាពលរដ្ឋមុននឹងទិញឱសថគ្រប់ប្រភេទ សូមពិនិត្យមើល លតាបត្របញ្ជិកាដែលមានបិទលើសំបកវេចខ្ចប់ ហើយលតាបត្រដែលត្រឹមត្រូវ គឺមានពីរផ្នែក គឺទី (១) ផ្នែកខាងលើមានឈ្មោះ គ្រឹះស្ថានអាហរ័ណ នីហរ័ណឱសថ និងទី (២) ផ្នែកខាងក្រោមមានលេខបញ្ជិកា ដូចមានគំរូភ្ជាប់មកជាមួយ។

ក្រសួងសុខាភិបាល បានបញ្ជាក់បន្ថែមថា​ សូមបងប្អូនប្រជាពលរដ្ឋទាំងអស់មិនត្រូវទិញ និងប្រើប្រាស់ឱសថដែល គ្មានលេខបញ្ជិកាខាងលើ ជាបន្តទៀតទេ ព្រោះឱសថនេះមិនអាចធានាបាននូវ គុណភាព សុវត្ថិភាព និងប្រសិទ្ធភាព បានឡើយ ហើយអាចជាឱសថក្លែងក្លាយ បណ្តាលឱ្យប៉ះពាល់សុខភាព ឬមានគ្រោះថ្នាក់ដល់អាយុជីវិតរបស់អ្នកប្រើប្រាស់ទៀតផង។

គួរបញ្ជាក់ថា ក្នុងករណីដែលបុគ្គលដែលចែកចាយ ឬលក់ឱសថគ្មានលេខបញ្ជិកា រួមទាំងជនពាក់ព័ន្ធដទៃទៀតត្រូវបញ្ឈប់ការនាំចូល ចែកចាយ ឬលក់ឱសថខាងលើ មិនអនុវត្តតាមសេចក្ដីជូនដំណឹងនេះ ក្រសួងសុខាភិបាលនឹងមានវិធានការតឹងរ៉ឹង ទៅតាមច្បាប់ ស្តីពីវិសោធនកម្មច្បាប់ស្តីពីការគ្រប់គ្រងឱសថជាធរមាន ៕

សម្រួលដោយ៖ លីដា