ប្រព័ន្ធផ្សព្វផ្សាយរដ្ឋរបស់កូរ៉េខាងជើង កាលពីថ្ងៃសុក្រ (ម៉ោងក្នុងស្រុក) បានចេញផ្សាយរូបថត ដែលបង្ហាញថាមេដឹកនាំកូរ៉េខាងជើង លោក Kim Jong Un និងកូនស្រី ក្នុងសម្លៀកបំពាក់អាវស្បែក និងពាក់វ៉ែនតាខ្មៅ ទៅទស្សនាទីបញ្ជាការកងទ័ពអាកាសកូរ៉េខាងជើង។ទីភ្នាក់ងារព័ត៌មានកណ្តាលកូរ៉េ (KCNA) បាននិយាយថា មេដឹកនាំកូរ៉េខាងជើង បានទៅទស្សនកិច្ចតាំងពីថ្ងៃព្រហស្បតិ៍ តែជានិច្ចជាកាល ប្រព័ន្ធផ្សព្វផ្សាយកូរ៉េខាងជើង តែងតែរាយការណ៍ព័ត៌មាននៅក្រោយមួយថ្ងៃ បន្ទាប់ពីកម្មវិធីដែល លោក Kim Jong Un បានចូលរួមកើតឡើង ហើយទស្សនកិច្ចនេះបានកើតឡើង មួយសប្តាហ៍ក្រោយ បន្ទាប់ពីកូរ៉េខាងជើងបាននិយាយថា ខ្លួនបានបាញ់បង្ហោះផ្កាយរណបចារកម្មចូលក្នុងតារាវិធីបានជោគជ័យ។

ជាមួយគ្នានេះ ប្រព័ន្ធផ្សព្វផ្សាយរដ្ឋរបស់កូរ៉េខាងជើង បានចេញផ្សាយព្រោងព្រាត អំពីផ្កាយរណបចារកម្មចូលក្នុងតារាវិធី បង្ហាញពីមូលដ្ឋានយោធាកូរ៉េខាងជើង និងទីតាំងយុទ្ធសាស្ត្រជុំវិញពិភពលោក ប៉ុន្តែមិនបានបង្ហោះអំពីរូបភាពលំអិតណាមួយនៃផ្កាយរណបនេះជាសាធារណនោះទេ។

ការចុះផ្សាយរបស់សារព័ត៌មានក្នុងស្រុក ក៏បានចុះផ្សាយរូបថត លោក គីម ជុងអ៊ុន នៅក្នុងបន្ទប់មួយ ដែលមានអេក្រង់ធំនៅលើជញ្ជាំង រួមជាមួយនឹងមន្ត្រីកងទ័ពអាកាស តែផ្នែកខ្លះនៃរូបថតនោះត្រូវបានដាក់ព្រិលដើម្បីបិតបាំងផ្នែកមួយចំនួនផងដែរ៕