រាជរដ្ឋាភិបាលកម្ពុជា បានសម្រេចអនុញ្ញាតឱ្យពលករចំណាកស្រុកអាចធ្វើលិខិតឆ្លងដែន ឬពន្យារលិខិតឆ្លងដែន នៅតាមស្ថានទូតខ្មែរប្រចាំនៅប្រទេសដែលពួកគេបម្រើការងារ ដើម្បីជួយសម្រួលដល់ការលំបាករបស់ពួកគាត់ ចំណេញពេលវេលា និងកាត់បន្ថយការចំណាយថវិកាលើការជិះយន្តហោះមកកម្ពុជា។ នេះបើយោងតាមប្រសាសន៍របស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ថ្លែងក្នុងពិធីសម្ភោធដាក់ឲ្យប្រើប្រាស់ជាផ្លូវការ «មជ្ឈមណ្ឌលសំចតនិងស្ដារនីតិសម្បទាជនរងគ្រោះប៉ោយប៉ែត» នាព្រឹកថ្ងៃទី១៨ ខែធ្នូ ឆ្នាំ២០២៣។

ឯកឧត្តម អភិសន្តិបណ្ឌិត ស សុខាបានបន្តថា៖«ជាពិសេសពលករដែលធ្វើការនៅក្រៅប្រទេស ទាំងនៅប្រទេសថៃ កូរ៉េ ម៉ាឡេស៊ី នៅប្រទេសជប៉ុនជាដើម ពេលមួយនោះសម្តេចធិបតី ហ៊ុន ម៉ាណែតនាយករដ្ឋមន្ត្រីកម្ពុជា បានប្រគល់តួនាទីឱ្យខ្ញុំសិក្សាជាមួយក្រសួងសា្ថប័នពាក់ព័ន្ធ ជាពិសេសក្រសួងការងារ ដើម្បីសម្របសម្រួល និងដាក់មន្ត្រីនៃអត្តសញ្ញាណកម្មនៅប្រទេសគោលដៅដែលមានពលករច្រើន។ ហើយការងារនេះយើងនឹងចាប់ផ្តើមពីថ្ងៃទី០១ ខែមករា ឆ្នាំ២០២៤ ខាងមុខនេះ»។

ឯកឧត្តម អភិសន្តិបណ្ឌិត ស សុខា បានបន្ថែមទៀតថា៖ «ពលករដែលធ្វើការនៅក្រៅប្រទេស មិនចាំបាច់មកភ្នំពេញ មកខេត្ត ដើម្បីធ្វើ ឬបន្តពន្យារលិខិតឆ្លងដែន (Passport) គាត់ទៀតទេ អ៊ីចឹងគាត់គ្រាន់តែទៅស្ថានទូតខ្មែរប្រចាំប្រទេសនីមួយៗ ហើយក៏អាចស្នើសុំធ្វើលិខិតឆ្លងដែនថ្មី និងអាចដាក់ក្នុងការពន្យារ Passport តាមការចាំបាច់ណាមួយបានផងដែរ»៕ 

សម្រួលអត្ថបទដោយ៖ Puthseyha