នៅវេលាម៉ោង ១០យប់ថ្ងៃទី ៣០ ខែមេសា ឆ្នាំ ២០២៥ មន្ត្រីនគរបាលប៉ុស្តិ៍ Muang Nakhon Nayok បានទទួលសេចក្តីរាយការណ៍ថា មានអគ្គិភ័យឆាបឆេះផ្សាររោងក្លឿ ស្ថិតក្នុងឃុំ Sarika ស្រុក Muang ខេត្ត Nakhon Nayok ប្រទេសថៃ។ ពួកគេបានរាយការណ៍ជូនថ្នាក់លើ មុនពេលធ្វើដំណើរចុះទៅពិនិត្យកន្លែងកើតហេតុ រួមជាមួយនឹងមន្ត្រីការពារ និងកាត់បន្ថយគ្រោះមហន្តរាយ និងរថយន្តពន្លត់អគ្គិភ័យ។

កន្លែងកើតហេតុជាឃ្លាំងលក់ស្បែកជើងដែលមានហាងលក់ទំនិញនៅជាប់គ្នាជាច្រើនកន្លែង។ អ្នកភូមិ និងម្ចាស់ហាងបានរើឥវ៉ាន់ចេញ ហើយប្រញាប់ប្រញាល់ជួយពន្លត់ភ្លើង។ អគ្គិភ័យនេះមានទំហំធំធេងណាស់ មុនពេលដែលពួកគេអាចគ្រប់គ្រងភ្លើងនៅក្នុងតំបន់ដែលមានកំណត់ ដើម្បីការពារកុំឲ្យរាលដាលដល់តំបន់ផ្សេងទៀតនៅក្បែរនោះ។ បន្ទាប់មកពួកគេបានបាញ់ទឹកពន្លត់ ដើម្បីកុំឲ្យភ្លើងឆាបឆេះតទៅទៀត។ តាមការចុះពិនិត្យបឋមបានរកឃើញថា តូបលក់ដូរចំនួនប្រមាណ៥ រងការខូចខាតដោយសារភ្លើងឆេះ ។ 

បើតាមការសន្និដ្ឋាន មូលហេតុដែលនាំឲ្យមានអគ្គិភ័យនេះ សង្ស័យមកពីការឆ្លងចរន្តអគ្គិសនី។ ទោះជាយ៉ាងណា មន្ត្រីជំនាញកោសល្យវិច្ច័យនឹងពិនិត្យ និងប្រមូលព័ត៌មានលម្អិតម្តងទៀត ដើម្បីស្វែងរកមូលហេតុពិតប្រាកដ។ ក្នុងហេតុការណ៍នេះមិនមាននរណាម្នាក់រងរបួសឬស្លាប់ឡើយ ចំណែកការខូចខាតនៅមិនទាន់ប៉ាន់ស្មានបាននៅឡើយទេ៕