អ្វីទៅដែលជាព្រាយខ្លា ច្រាបព្រៃ ឬខ្លាច្រាប?

តាមពិតទៅរហសនាមព្រាយខ្លា ច្រាបព្រៃ ឬខ្លាច្រាប គឺជាឈ្មោះតែមួយដែលប្រជាជនខ្មែរយើងនិយមហៅតាមតំបន់តែប៉ុណ្ណោះ។

ព្រាយខ្លា គឺជាញាណឬក៏វិញ្ញាណដែលស្ថិតនៅក្នុងសត្វខ្លា ដោយសារតែភាគច្រើនវិញ្ញាណអស់នោះត្រូវបានសម្លាប់ដោយសត្វខ្លា ហើយរិតតែពិសេសទៀតនោះបើសិនជាសត្វខ្លានោះធ្លាប់សម្លាប់មនុស្សពីមុនមកច្រើន វិញ្ញាណដែលនៅក្នុងសត្វខ្លានោះនឹងមានអំណាចកាន់តែខ្លាំងខ្លា។ ត្រូវចងចាំថាមិនមែនអោយតែសត្វខ្លាសុទ្ធតែជាព្រាយខ្លានោះទេ ហើយដើម្បីដឹងថាខ្លាមួយណាជាព្រាយខ្លា គេចម្គាល់ដោយមើលទៅមើលក្បាលខ្លានោះមានពន្លឺស្រមោលនៃវិញ្ញាណ។

ពួកព្រានព្រៃបរបាញ់សត្វនៅពេលដែលចេញប្រមាញ់ដេកផ្លូវ ពួកគេតែងតែធ្វើធ្នាក់សម្រាប់សម្រាកនៅដើមឈើខ្ពស់ៗដើម្បីជៀសវៀសត្រូវសត្វសាហាវលេបខាំត្របាក់បាន។

នៅពេលយប់បន្តិចភាគច្រើនពួកព្រាយខ្លានឹងក្រឡាខ្លួនបន្លំធ្វើជាសាច់ញាតិឬមនុស្សដែលអ្នកស្គាល់ រួចមកធ្វើជាស្រែកហៅអ្នកអោយចុះទៅរកដោយកុហកថា អ្នកផ្ទះឈឺ ឬមានរឿងអ្វីកើតឡើងចំពោះមនុស្សអ្នកដែលធ្លាប់បានស្គាល់។ បើសិនជាព្រានព្រៃនោះភ្លេចខ្លួនចាញ់បោកចុះទៅតាមសម្ដីវានោះនឹងត្រូវព្រាយខ្លាចខាំត្របាក់រហូតដល់ស្លាប់ ប៉ុន្តែបើសិនជាព្រានដឹងខ្លួនពួកគាត់នឹងអោយសញ្ញាគ្នាប្រុងប្រៀប រួចឆ្លើយតបទៅវាវិញថា “ចាំនៅខាងក្រោមហ្នឹងហើយចាំចុះទៅ” បន្ទាប់មកទៀតគេនឹងព្រួតគ្នាបាញ់សំដៅទៅរកសត្វខ្លានោះភ្លាមៗ ហើយគេនឹងបានឮសំលេងស្រែកងរំពងពេញព្រៃ ចំនែកពន្លឺភ្លឺនៅលើក្បាលខ្លានឹងរលត់បាត់ទៅ ប៉ុន្តែពួកព្រានក៏មិនទាន់ចុះទៅមើលភ្លាមៗដែរ គេចាំទាល់តែដល់ពេលព្រឹកថ្ងៃរះទើបចុះទៅមើលកន្លែងខ្លាងាប់នោះ។