ភ្នំពេញ ៖ ក្រុម​ហ៊ុន Moonton ដែល​ជា​​អ្នក​បង្កើត​វិញ្ញាសា Mobile Legends: Bang Bang ដែល​ជា​ប្រភេទ​វិញ្ញាសា​កីឡា​អេឡិចត្រូនិក​មួយ​ដ៏​ពេញ​និយម​នៅ​លើ​ពិភព​លោកបាន​បញ្ចេញ​ស្នាដៃ​ថ្មី​ទៀត​ ​ដែល​​ជា​ដំណឹង​ដ៏​រំភើប​សម្រាប់​អ្នក​លេង។ នេះបើតាមការ​ប្រកាស​ជា​ផ្លូវ​ការ​ក្នុង​សន្និសីទ​សារព័ត៌មានសកល Moonton Epicon 2019 ដែលមានប្រាក់រង្វាន់ជ័យលាភីរហូតដល់២៥ម៉ឺន​ដុល្លារ​អាម៉េរិក។

ក្នុងសន្និសីទសារព័ត៌មាន ដែលប្រារព្ធធ្វើឡើងនៅ​ទី​ក្រុង​កូឡាឡាំពួរ ប្រទេស​ម៉ាឡេស៊ី កាលពីពេលថ្មីៗនេះ ​ប្រទេស​ជុំ​វិញ​ពិភព​លោក​ចូល​រួមមាន​ដូច​ជា៖​ ចិន ឥណ្ឌូណេស៊ី កម្ពុជា ឡាវ ព្រុយណេ សិង្ហបុរី និង​ប្រទេស​ជា​ច្រើន​ទទៀតបាន​បង្ហាញ​ពី​ជោគជ័យ​យ៉ាង​ខ្លាំង​អំពី​វិញ្ញាសា Mobile Legends និង​បង្ហាញ​ពី​គម្រោង​ពង្រីក​ថ្មី​ៗ​ជា​ច្រើន​ទៀត។លោក Justin Yuang នាយកប្រតិបត្តិ និង​ជា​សហស្ថាបនិក​ក្រុម​ហ៊ុន Moonton បាន​បញ្ជាក់ថា ក្រុម​ការងារ​ជា​សកល​របស់​លោក​កំពុង​កែ​លម្អ​តាមតម្រូវ​តាម​ទីផ្សារ និងឱ្យ​ស្រប​ទៅ​នឹង​បច្ចេកវិទ្យា​ទំនើប​ចុង​ក្រោយ ដើម្បី​ធ្វើឱ្យ​មានភាព​ងាយស្រួល​​ជូន​ដល់​អ្នក​លេង​ទាំង​ឡាយដោយ​ទទួល​បាន​លទ្ធលគួរ​ជា​ទី​ពេ​ញ​ចិត្ត។ លោកបានបន្ដថា អ្វី​ដែល​កាន់​តែ​ពិសេស​នោះ​គឺ​ការ​ប្រកាស​រៀប​ចំ​ការ​ប្រកួតអន្តរជាតិ​ធំ​មិន​ធ្លាប់មាន​ គឺ​ Mobile Legends: Bang Bang World Championship ដែល​គ្រោង​ធ្វើ​នៅ​ថ្ងៃ​ទី​១១ ដល់ទី​១៧ ខែ​វិច្ឆិកា ឆ្នាំ​២០១៩ ​នៅ​ទី​លាន Axiata Arena ក្នុង​ទី​ក្រុង​កូឡាឡាំពួរ ប្រទេស​ម៉ាឡេស៊ី ដែលមានប្រាក់រង្វាន់ចំនួន២៥​ម៉ឺនដុល្លារ។

រដ្ឋ​មន្ត្រី​យុវជន និង​កីឡា​ប្រទេស​ម៉ាឡេស៊ី​ ឯកឧត្ដម Syed Saddiq bin Syed Abdul Rahman បានមាន​ប្រសាសន៍​​ថា ​កីឡា​អេឡិចត្រូនិក​មាន​សក្កានុពល​ខ្លាំង​ ដែលមាន​ចរន្ត​ទឹក​ប្រាក់​រាប់​លាន​ដុល្លារ​អាម៉េរិក​ ដែល​ជា​ផ្នែក​មួយ​ជួយ​ជំរុញ​ដល់​កំណើន​សេដ្ឋកិច្ច​ប្រទេស​ម៉ាឡេស៊ី និង​អរគុណ​ដល់​ក្រុម​​ហ៊ុន MOONTON ដែល​បាន​ជួយ​ដល់​ពួក​យយើងដើរ​លើ​ផ្លូវ​ពិភព​លោក​តាម​រយៈ​ការ​​ប្រកួត​ជើង​ឯក​ពិភព​លោក Bang Bang World Championship។ជា​មួយ​គ្នា​នេះ ​លោក Dato Anath S. Nathan ប្រធានសមាគម Esports ម៉ាឡេស៊ី​បាន​និយាយ​ថា វិញ្ញាសា Mobile Legends: Bang Bang គឺ​ជា​វិញ្ញាសា​មួយ​ដ៏​ល្បី​ល្បាញ​នៅ​ប្រទេស​ម៉ាឡេស៊ី ហើយវិញ្ញាសា​នេះ​ជា​ប្រភេទ​កីឡា​ដែល​​មាន​លក្ខណៈ​អាជីព​ពិត​ប្រាកដ។ជើង​ឯក​ពិភព​លោក​នេះ​ហៅ​កាត់​ថា M1 ដែល​នឹង​មាន​​ក្រុម​ចំនួន​១៦ មក​ពី​១៤​ប្រទេស​ចូល​រួម​ប្រកួត​ដើម្បី​ឆ្ពោះ​ទៅ​គ្រង​ជើងឯក​ដែល​មាន​ប្រាក់​រង្វាន់​ជាង២៥​ម៉ឺន​ដុល្លារ​អាម៉េរិក។ អ្នក​គាំទ្រ​នឹង​បាន​ទស្សនា​តាម​រយៈ​ផ្សាយ​ផ្ទាល់​តាម​ YouTube។

Mobile Legends: Bang Bang 2.0 គឺ​ជា​ផ្នែក​ដ៏​សំខាន់​ដែល​ត្រូវ​បាន​បង្ហាញ​ជា​មួយ​ការ​កែ​លម្អ​ថ្មី ម៉ាស៊ីន​កាន់​តែ​ល្អ និង​លឿនជាង​មុន​​ដែល​ពិត​ជា​បំពេញ​តាម​តម្រូវ​ការ​របស់​អ្នក​លេង។ លក្ខណៈពិសេស​ថ្មី​ គឺ​​​កែ​លម្អ​ផែន​ទី​ថ្មី បង្កើន FP កាត់​បន្ថយ AFK ជា​ដើម។ ចំពោះការ​កែ​លម្អ​ថ្មី​នេះ​​គឺ​អនុលោម​ទៅ​តាម​សេចក្តី​ណែនាំពី​ប្រភេទ​ថ្មីមួយ​ទៀត​គឺ​ Mobile Legends: Adventure ដែល​ជា​យុទ្ធសាស្ត្រហ្គេម​កាត RPG ដែល​នឹង​ចេញ​ជា​ផ្លូវ​ការ​នា​ថ្ងៃ​ទី០​១ ខែ​សីហា ឆ្នាំ​២០១៩​ខាង​មុខ​នេះ។ មុខ​ហ្គេម​ថ្មី​នេះ​កាន់​តែ​ធ្វើ​ឱ្យប្រសើរ​ឡើង​អំពីតម្រូវ​ការអ៊ីនធឺណេត​ទាប និងកម្រិត​រក្សា​ទុក​ទាប។ វា​ត្រូវ​បាន​ឌីហ្សាញ​ឡើង​ដើម្បី​កាន់​តែ​ងាយ​ស្រួល និង​សាមញ្ញ។ អ្នក​លេង​៥​នាក់​​ក្នុង​ពេល​តែ​មួយ​នៅ​លើ​សមរភូមិ​ប្រយុទ្ធ ប្រើ​គំនិត​ប្រាជ្ញា​រៀប​ចំ​យុទ្ធ​សាស្ត្រវាយ​លុក​សត្រូវ។សូមបញ្ជាក់ថា ក្រុម​ហ៊ុន MOONTON បាន​សន្យាចំពោះ​អ្នក​គាំទ្រថា ពួក​គេ​នឹង​​ទទួល​បាន​នូវ​អ្វី​ដែល​ថ្មី​ៗ​ជា​ច្រើន​ទៀតពី Mobile Legends ជុំ​វិញ​ពិភព​លោក​តាម​រយៈ​តន្ត្រី ការ​អប់រំ កំប្លែងតុក្កតា កម្មវិធី​​ទូរទស្សន៍ និង​ភាព​យន្តជា​ដើម​ នា​ពេលខាង​មុខ៕