រមណីយដ្ឋានល្អាងភ្នំចាស់ ជារមណីយដ្ឋានបុរាណមានអាយុកាលរាប់ពាន់ឆ្នាំមកហើយ ដោយធ្លាប់ជាទីកន្លែងរបស់មនុស្សបុរេប្រវត្តិតាំងទីលំនៅទៀតផង។ តំបន់ភ្នំប្រវត្តិសាស្រ្តនេះលាតសន្ធឹងលើផ្ទៃដីប្រមាណ ១០៣ហិចតា មានកម្ពស់ជាង ២០០ម៉ែត្រ និងត្រូវបានចែកចេញជា ៣ផ្នែក គឺខ្នងភ្នំព្រះព្រហ្ម ខ្នងភ្នំព្រះពុទ្ធ និងខ្នងភ្នំកិន្នរ។

ប្រភពរូបថត៖ Sabay

ចំណែក ភ្នំចាស់ វិញ មានល្អាងបែកជារូងតូចដល់ទៅ៣០ ដោយខ្លះមានពន្លឺចាំងចូលអាចឱ្យភ្ញៀវទេសចរចូលលេងបាន ខ្លះទៀតងងឹតស្លុតមិនសូវមានមនុស្សហ៊ានចូលនោះទេ ហើយក្នុងនោះមានល្អាងធំជាងគេមួយ គឺមានឈ្មោះថាល្អាងជង្រុក។

ប្រភពរូបថត៖ Sabay

សព្វថ្ងៃទីតាំងប្រវត្តិសាស្ត្រមួយនេះត្រូវបានប្រជាជនមានជំនឿយ៉ាងមុតមាំ ចំពោះបារមីផ្លូវងងឹត ក៏ដូចជាអបិយជំនឿយផ្សេងៗ ដូចនេះហើយទើបជារៀងរាល់ឆ្នាំអ្នកស្រុកតែធ្វើពិធីឡើងម្ដង ឬហៅថាបុណ្យថ្វាយម្ចាស់ភ្នំ ដើម្បីប្រជាជនក្នុងតំបន់មានសេចក្ដីខុស ក៏ដូចជាដើម្បីភ្ញៀវទេសចរទៅលេងបានសុខសប្បាយ មិនជួបគ្រោះផ្សេងៗ ម៉្យាងត្បិតពីសម័យដើមតំបន់ភ្នំចាស់ធ្លាប់មាន ជនជាតិភាគតិចសួយ រស់នៅ និងគ្រប់គ្រងដោយមេកន្ទ្រាញខ្លាំងពូកែម្នាក់ឈ្មោះ បាភ្នំ។ អ្វីដែលធ្វើឱ្យមានជំនឿកប់ជ្រៅចំពោះភ្នំនេះបន្ថែមនោះគឺថា ភ្ញៀវទេសចរដែលយកគ្រឿងស្រវឹងទៅផឹកស៊ីឡូឡានៅទីនោះ ឬនិយាយប៉ប៉ាច់ប៉បោចប៉ះពាល់ទីបុរាណនេះ ពួកគេអាចឃើញសត្វពស់ធំៗ សត្វខ្លា ឬសត្វសាហាវផ្សេងៗ មកបន្លាចឱ្យភ័យរត់ជាមិនខាន។ រមណីយដ្ឋានល្អាងភ្នំចាស់ មានទីតាំងស្ថិតនៅ ភូមិមនោរម្យ ឃុំហោងសំណុំ ស្រុកឱរ៉ាល់ ខេត្តកំពង់ស្ពឺ។ បើធ្វើដំណើរតាម ផ្លូវជាតិលេខ៤២ ពី ខេត្តកំពង់ស្ពឺ ទៅកាន់ ស្រុកឱរ៉ាល់ គឺមានចម្ងាយប្រមាណ ៣០គីឡូម៉ែត្រ។ 

ប្រភពរូបថត៖ ប្រជាប្រិយ

• ពេលវេលាល្អគួរទៅលេង រមណីយដ្ឋានល្អាងភ្នំចាស់

ត្បិតជាទីតាំងភ្នំ អ្នកនឹងត្រូវឡើងលេងលើភ្នំតាមកាំជណ្ដើរ ឬឡើងតាមថ្មភ្នំនៅផ្នែកខ្លះ ក៏ដូចជាចូលក្នុងល្អាងជាដើម។ អ៊ីចឹងហើយពេលវេលាដ៏ល្អគួរទៅលេងនៅកន្លែងនេះ គឺ ខែប្រាំង (ខែវិច្ឆិកា - ខែមេសា) មិនមានភ្លៀង និងបញ្ជៀសគ្រោះថ្នាក់ពីការឡើងភ្នំបានថែមទៀតផង។ ប៉ុន្ដែបើអ្នកយល់ថា ភ្លៀងមិនជាបញ្ហាចោទសម្រាប់អ្នកនោះទេ អ្នកអាចទៅលេងរមណីយដ្ឋាននេះ នៅរដូវវស្សាបាន (ខែឧសភា - ខែតុលា) ព្រោះទេសភាពកាន់តែមានភាពស្រស់ស្អាត ព្រៃឈើត្រូវទឹកភ្លៀងមានសភាពខៀវខ្ចីល្អ និងមានអាកាសធាតុត្រជាក់ថែមទៀតផង។ 

ប្រភពរូបថត៖ Sabay

• របស់របរចាំបាច់ជាប់ខ្លួនសម្រាប់យកទៅ រមណីយដ្ឋានល្អាងភ្នំចាស់ 

ទៅដល់តំបន់នេះហើយ ជៀសមិនផុតពីឡើងភ្នំ និងចូលលេងក្នុងល្អាងដែលជាកន្លែងមនុស្សធ្លាប់រស់នៅនោះទេ ដូចនេះអ្នកគប្បីមានរបស់ចាំបាច់មួយចំនួននេះសាគួរជាមុន។

- ស្បែកជើងកីឡា៖ អ្នកនឹងត្រូវដើរច្រើន ហើយស្បែកជើងកីឡានិងជួយអ្នកមិនឱ្យពងជើង ឬរលាកបាន។ ហើយបើអាចទៀតនោះគប្បីមានស្បែកជើងឡើងភ្នំតែម្ដងទៅ ព្រោះវាមានបាតក្រឡាជ្រៅ និងក្រាស់ មិនងាយឱ្យអ្នករអិលនោះទេ។ 

ប្រភពរូបថត៖ Google 

- បាយម្ហូប៖ បើចង់សម្រាកលំហែនឹងធម្មជាតិឱ្យបានយូរនៅកន្លែងនេះ អ្នកគប្បីមានបាយម្ហូបទៅខ្លះ ឬទិញពីផ្លូវជាតិទៅក៏បាន ត្បិតតំបន់នេះនៅឆ្ងាយមិនសម្បូររបស់សម្រាប់ញ៉ាំនោះទេ។ 

- ប្រេងកូឡា/ថ្នាំលាបការពារសត្វល្អិតទិចឬខាំ៖ តំបន់ព្រៃភ្នំ ឬក្នុងល្អាង សុទ្ធសឹងជាកន្លែងសត្វល្អិត ក៏ដូចជាសត្វផ្សេងរស់នៅ ដូចនេះវាអាចទិចឬខាំអ្នក ត្រៀមរបស់ទាំងនោះគឺអាចជួយអ្នកបាន។ 

- ពិល៖ ល្អាងខ្លះមានពន្លឺមិនគ្រប់គ្រាន់នោះទេ ដូចនេះបើមានពិល អ្នកនឹងសង្កេតទីកន្លែងទាំងនោះបានកាន់តែលម្អិត។ 

- ដបទឹក៖ គប្បីមានដបទឹកតាមខ្លួន បើអាចគឺដបទឹករក្សាសីតុណ្ហភាពបានយូរ ព្រោះមានទឹកត្រជាក់ៗផឹកនៅកន្លែងឆ្ងាយពីទីប្រជុំជន ជារឿងម្រណាស់។ 

- ធូប ទៀន ឬគ្រឿងតង្វាយផ្សេងៗបើមាន៖ ភ្នំចាស់ជាទីកន្លែងស័ក្ដិសិទ្ធិរបស់ អ្នកស្រុកឱរ៉ាល់ ដូចនេះត្រៀម ធូប ទៀន ឬគ្រឿងតង្វាយផ្សេងៗ ក៏ល្អ ព្រោះអ្នកអាចបួងសួងសុំសេចក្ដីសុខនៅកន្លែងនោះ ឬបន់ផ្សងក្ដីប្រាថ្នាអ្វីផ្សេងៗបានផងដែរ។ 

អត្ថបទដោយ៖ កុសល