រាជធានីភ្នំពេញ ៖ នាព្រឹកថ្ងៃទី៣០ ខែកញ្ញា ឆ្នាំ២០១៩នេះ នៅទីស្តីការក្រសួងសេដ្ឋកិច្ច និងហិរញ្ញវត្ថុ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាលនៃមូលនិធិគន្ធបុប្ផាកម្ពុជា បានទទួលជួបជាមួយ លោក Qiu Guoxing ប្រធានអគ្គនាយកក្រុមហ៊ុន Prince Real Estate (Cambodia) Group Co., Ltd និងជាប្រធានសមាគមមិត្តភាពសភាពាណិជ្ជកម្មចិនហ្វូជាននៅកម្ពុជា។

ក្នុងជំនួបនេះដែរ លោក Qiu Guoxing និងសហការី បាននាំយកថវិកាសប្បុរសធម៌សរុបចំនួន ២៣៥, ២៨៥ ដុល្លារអាមេរិក ជូនមូលនិធិគន្ធបុប្ផាកម្ពុជា។ 

ជាការឆ្លើយតបនូវកាយវិការដ៏សប្បុរសនេះ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងថា នេះគឺជាការរួមចំណែកក្នុងការលើកកម្ពស់ស្មារតីជួយគ្នាទៅវិញទៅមក ដែលបង្ហាញពីការជួយ និងចូលរួមចំណែកក្នុងការអភិវឌ្ឍនៅកម្ពុជា ក៏ដូចជាការបន្តផ្សារភ្ជាប់ទំនាក់ទំនង និងពង្រឹងមិត្តភាពល្អរវាងប្រទេស និងវិនិយោគិន ក៏ដូចជារវាងប្រជាជនចិន និងកម្ពុជា ដែលមានទំនាក់ទំនងជិតស្និទ ជាមួយគ្នាជាយូរមកហើយ។

គួរបញ្ជាក់ផងដែរថា កាលពីឆ្នាំ២០១៨ កន្លងមក ក្រុមហ៊ុន Prince Real Estate (Cambodia) Group Co., Ltd បានចូលជាសមាជិកស្ថាបនិកមូលនិធិគន្ធបុប្ផាកម្ពុជា ចំនួន២៩,២០៨ដុល្លារអាមេរិក និងសមាគមមិត្តភាពសភាពាណិជ្ជចិនហ្វូជាននៅកម្ពុជា ក៏បានចូលជាសមាជិកស្ថាបនិកមូលនិធិគន្ធបុប្ផាកម្ពុជា ចំនួន ៣០,៦០០ដុល្លារអាមេរិក ផងដែរ៕ Thona