វាមិនមែនរាល់ថ្ងៃនោះទេដែលអ្នកបានឃើញសត្វមឹក ផ្កាយសមុទ្រ និង បង្គាដែលធ្លាក់មកពីលើមេឃតាមគ្រាប់ភ្លៀងនោះ ប៉ុន្តែប្រាកដណាស់ថាវាបានកើតឡើងទៅហើយនៅតាមបណ្តោយឆ្នេរនៃក្រុង ជីងតាវ ប្រទេសចិន ក្រោយពីមានខ្យល់បោកបក់ខ្លាំងបានកួចនាំសត្វសមុទ្រជាច្រើនប្រភេទឡើងពីសមុទ្រមក ។

កាលពីថ្ងៃពុធកន្លងទៅថ្មីៗនេះ ទីក្រុងជីងតាវ ដែលនៅជាប់នឹងឆ្នេរសមុទ្រ ស្ថិតក្នុងខេត្ត សានទុង បានរងគ្រោះដោយសារព្យុះបោកបក់ដ៏ធំមួយដែលបណ្តាលឱ្យដួលរលំដើមឈើ និង បង្គោលផ្លាកសញ្ញាធំៗជាច្រើន ព្រមទាំងទឹកជន់លិចផ្លូវ ជាហេតុធ្វើឲ្យកកស្ទះចរាចរណ៍គ្រប់ទីកន្លែង ។ ប៉ុន្តែ មានបាតុភូតដ៏កម្រមួយបានកើតឡើង ដែលទាក់ទាញចំណាប់អារម្មណ៍ជាខ្លាំងក្នុងអំឡុងពេលនោះគឺថា សត្វសមុទ្រផ្សេងៗគ្នាជាច្រើនប្រភេទបានចាប់ផ្តើមធ្លាក់ពីលើមេឃមកជាបន្តបន្ទាប់ ។

រូបភាពដែលមិនគួរឲ្យជឿជាសន្លឹកត្រូវបានបង្ហោះនៅលើគេហទំព័ររបស់ចិន ដែលបង្ហាញពីសត្វមឹក ផ្កាយសមុទ្រ បង្គា និង សប្បីសត្វជាច្រើនប្រភេទ បានហោះផ្លោងតាមខ្យល់មកធ្លាក់លើកញ្ចក់មុខរថយន្ត ។ រូបភាពទាំងនេះត្រូវបានចែករំលែកបន្តដោយភ្នាក់ងារឧត្តុនិយមជាតិរបស់ចិន ហើយក្រោយមកក៏កើតជាចំណងជើងសម្រាប់ព្រឹត្តិការណ៍ចម្លែកមួយនេះថាជា “ភ្លៀងគ្រឿងសមុទ្រ”(Seafood rains) ។

អ្នកជំនាញផ្នែកឧត្តុនិយមបាននិយាយថា សត្វសមុទ្រទាំងនោះត្រូវបានកួចពីសមុទ្រឡើងលើអាកាស ហើយក៏ត្រូវកម្លាំងខ្យល់បោកបក់បាចសាចរាយប៉ាយគ្រប់ទីកន្លែងយ៉ាងដូច្នេះទៅ ៕