បាតុកម្មនៅហៃទី៖ ខ្មាន់កាំភ្លើងបាញ់សម្លាប់បាតុករ, រីឯបាតុករវិញ ព្រួតវាយខ្មាន់កាំភ្លើងនោះរហូតដល់ស្លាប់ និងដុតសាកសពកម្ទេចចោល

#ហិង្សា# #បាតុកម្ម# #សង្គម# #នយោបាយជាតិ#

633

បាតុកម្មនៅក្នុងប្រទេសហៃទី បានកើតឡើង បណ្តាលឲ្យមនុស្ស២នាក់បានស្លាប់ ។ ខ្មាន់កាំភ្លើងបានបាញ់បាតុករម្នាក់ស្លាប់ ខណៈនោះ ខ្មាន់កាំភ្លើងរូបនោះ ក៏ត្រូវក្រុមបាតុករចាប់បានវិញ ហើយនាំគ្នាវាយទាត់ធាក់ រហូតដល់ស្លាប់ រួចដុតកម្ទេចសាកសពចោលយ៉ាងរន្ធត់ ។

យោងតាមការផ្សាយរបស់កាសែត AlJazeeraកាលពីថ្ងៃទី២៨ ខែតុលា ឆ្នាំ២០១៩ បានបញ្ជាក់ថា ប៉ូលិសរាប់រយនាក់ ព្រមជាមួយអ្នកគាំទ្ររបស់ពួកគេ បាននាំគ្នាដើរដង្ហែក្បួននៅតាមដងផ្លូវធ្វើបាតុកម្ម កាលពីថ្ងៃទី២៧ ខែតុលា ដើម្បីទាមទាររដ្ឋាភិបាល ឲ្យដំឡើងប្រាក់ខែដល់កងកម្លាំងអ្នកអនុវត្តច្បាប់ ។

ប្រភពបន្តថា នៅពេលនោះ ជនរងគ្រោះម្នាក់ត្រូវបាញ់សម្លាប់ ខណៈកំពុងស្រែកទាមទារឲ្យប្រធានាធិបតីហៃទី លោក Jovenel Moise ចុះចេញពីតំណែង ។ បុរសដែលលើកកាំភ្លើងបាញ់ប្រហារបាតុករ ក្នុងចំណោមហ្វូងមនុស្សនោះ ត្រូវបានក្រុមមនុស្សទាំងនោះចាប់បាន ហើយនាំគ្នាវាយរហូតដល់ស្លាប់ និងដុតកម្ទេចសាកសពចោលតែម្តង ។

ប៉ូលិសហៃទីបានថ្លែងការណ៍ថា «ជនមិនស្គាល់អត្តសញ្ញាណម្នាក់ត្រូវបានបាញ់សម្លាប់ ។ ហ្វូងមនុស្សដែលខឹងសម្បាក៏បានដុតជនដែលបាញ់ប្រហារនោះផងដែរ» ។

មន្ត្រីប៉ូលិសម្នាក់ពាក់ម៉ាស ដែលចូលរួមបាតុកម្មនិយាយប្រាប់ប្រភព AFP ថា «ប្រាក់ខែរបស់ពួកយើង គឺវេទនាខ្លាំងណាស់ ។ យើងគ្មានធានារ៉ាបរងអ្វីឡើយ ។ យើងមានបណ្ណធានារ៉ាប់រង ប៉ុន្តែគ្រប់តែមន្ទីរពេទ្យ ពេលដែលយើងចូលទៅទីនោះ គឺត្រូវចំណាយប្រាក់តែទាំងអស់ហ្នឹង» ៕ ប្រែសម្រួលដោយ៖ thach

សេចក្តីថ្លែងការណ៍លើកលែង

អត្ថបទនេះបានមកពីអ្នកប្រើប្រាស់របស់ TNAOT APP មិនតំណាងឱ្យទស្សនៈ និងគោលជំហរណាមួយរបស់យើងខ្ញុំឡើយ។ ប្រសិនបើមានបញ្ហាបំពានកម្មសិទ្ធិ សូមទាក់ទងមកកាន់យើងខ្ញុំដើម្បីបញ្ជាក់ការលុប។