អ្នកទាំងអស់គ្នាប្រាកដជាបានដឹងហើយអ្វីទៅដែលហៅថាជំនាញទន់ឬ(soft skill) ក៏ប៉ុន្តែនៅមានមនុស្សភាគតិចណាស់ដែលយល់ពីសារសំខាន់របស់វា។ ដូច្នេះថ្ងៃនេះ យើងនឹងមកស្វែងយល់ថាហេតុអ្វីមនុស្សគ្រប់រូបត្រូវការជំនាញទន់នេះជាចាំបាច់។ ជាក់ស្តែងនៅក្នុងវិស័យការងារនាពេលបច្ចុប្បន្ន រាល់និយោជកតែងតែត្រូវការបុគ្គលដែលមានសមត្ថភាពឬជំនាញណាមួយពិតប្រាកដដើម្បីបម្រើក្នុងស្ថាប័ននោះ។ក៏ប៉ុន្តែដើម្បីឲ្យក្រុមហ៊ុនឬស្ថាប័នមួយរីកចម្រើន និយោជិតទាំងអស់តម្រូវឲ្យមានជំនាញទន់ជាចាំបាច់ដោយហេតុថាអ្នកដែលមានជំនាញទន់នៅក្នុងខ្លួនតែងតែបំពេញការងារល្អប្រសើរជាងអ្នកដែលមានតែជំនាញរឹង។ ខាងក្រោមនេះគឺជាជំនាញ​ទន់​មួយចំនួន​ដែលចាំបាច់ត្រូវតែមាន៖

១.ជំនាញ​ធ្វើ​ការងារ​ជា​ក្រុម​

បុគ្គលិក​ដែល​ធ្វើការ​ជាមួយគ្នា​ត្រូវ​ចេះ​រៀបចំ​បែងចែកសហការនិង​ស្មារតី​ទទួលខុសត្រូវ​ចំពោះ​ការងារ ដើម្បី​អនុវត្តន៍​ឲ្យ​សម្រេចបាន​នូវ​គោលដៅ​ដែល​ស្ថាប័នបានកំណត់​។

​​២.ជំនាញ​ទំនាក់ទំនង​

ក្នុងការ​បំពេញការងា​រ​ចាំបាច់​ត្រូវមាន​ទំនាក់ទំនង​រវាង​បុគ្គលិកទៅ​អ្នកគ្រប់គ្រង និង​ពី​អ្នកគ្រប់គ្រងត្រឡប់មក​បុគ្គលិក​វិញដើម្បី​បង្កើន​ភាពស្និទ្ធស្នាល​​និង​ភាពរស់រវើក​ក្នុងពេល​បំពេញការងារ​។​

​​៣.ជំនាញ​គ្រប់គ្រង​ពេលវេលា​ 

បុគ្គលិក​ត្រូវ​បែងចែក​ពេលវេលានិង​ចាត់​អាទិភាព​ការងារ​ឲ្យ​បានច្បាស់លាស់ថា​តើ​ការងារ​ណាមួយ​ត្រូវធ្វើ​បន្ទាន់ ការងារ​ណា​ត្រូវធ្វើ​បន្ទាប់ និង​ការងារ​ណា​ត្រូវ​ទុក​ធ្វើ​ចុងក្រោយ​។

​​៤.ជំនាញ​ភាពជា​អ្នកដឹកនាំ​

បុគ្គលិក​ត្រូវមាន​ស្មារតី​នៃ​ភាពជា​អ្នកដឹកនាំ មានការ​ទទួលខុសត្រូវ និង​មានគំនិត​ច្នៃប្រឌិត​ខ្ពស់​ក្នុងការ​បំពេញការងារ ត្រូវ​ចេះ​លើកទឹកចិត្តនិង​ជួយ​ការងារ​គ្នា​ទៅវិញទៅមក​។ល​។

៥.ជំនាញក្នុងការគំនិតច្នៃប្រឌិត

ជាធម្មតាបុគ្គលិកដែលមានសមត្ថភាពក្នុងការសម្រេចនូវការងារចេះដោះស្រាយបញ្ហានិងហ៊ានប្រឈមមុខនឹងបញ្ហាថ្មីៗ ពួកគេតែងតែនាំមកនូវអ្វីដែលថ្មីនិងមានប្រសិទ្ធភាពជាងមុន។ នេះជាអ្វីដែលនិយោជកទូទៅចង់បាន។ 

៦.ជំនាញក្នុងការសម្រេចចិត្ត​​​​

ចំណុចនេះមិនមែនមានន័យថាអ្នកសម្រេចចិត្តភ្លាមដោយមិនគិតពីលទ្ធផលទេ តែអ្នកជាមនុស្សដែលចូលចិត្តការប្រថុយប្រថានបូករួមនិងការគិតពិចារណាបទពិសោធន៍ដែលខ្លួនធ្លាប់ឆ្លងកាត់ក្នុងកាលៈទេសៈប្រហាក់ប្រហែលគ្នានិងស្ដាប់យោបល់របស់អ្នកដៃគូរឬក្រុមការងាររបស់ខ្លួន។ មនុស្សជោគជ័យជាច្រើនចូលចិត្តការសម្រេចចិត្តលឿននិងការប្រថុយប្រថានតែមុននឹងធ្វើវាពួកគាត់សិក្សាលម្អិតពីវារួចបាត់ទៅហើយ មិនមែនធ្វើតាមតែអារម្មណ៍ឡើយ។

៧.មានទំនួលខុសត្រូវ

ជាមនុស្សមានទំនួលខុសត្រូវខ្ពស់ចូលចិត្តទទួលយកនូវកិច្ចការលំបាកផ្សេងៗដើម្បីយកដោះស្រាយព្រោះអ្នកគិតថាវាជាឱកាសក្នុងការរៀនសូត្របន្ថែម។ ក្រៅពីនេះអ្នកចេះទទួលស្គាល់ថាខ្លួនមិនចេះទាំងអស់នោះទេ ដូចនេះនៅពេលមានកំហុសឆ្គងមិនខ្លាចនឹងទទួលកំហុសដើម្បីកែប្រែអោយល្អឡើយ។

ដូច្នេះ ការមានជំនាញទន់នៅក្នុងខ្លួនពិតជាមានសារ:សំខាន់ណាស់។ សូមចាប់ផ្តើមរៀនបន្ថែមពី soft skill ប្រសិនបើអ្នករកឃើញពីចំណុចខ្វះខាតណាមួយដែលខ្លួនអ្នកមាន។ កុំចាំដល់គោបាត់បានធ្វើរបង កុំចាំដល់ពេលដែលត្រូវការទើបរិះរកស្វែងយល់បន្ថែម។ រៀនសូត្រពីវានោះអ្នកនឹងក្លាយជាបុគ្គលប្រកបដោយសក្តានុពលភាពមួយ។

អត្ថបទដោយសមាជិកProject Inspire​ ឡូវ ធានស៊ីញ