ការរាប់អានមិត្តគឺជារឿងសំខាន់ខ្លាំងណាស់ ព្រោះថា មិត្តភក្តិអាចជួយជ្រោមជ្រែង និងលើកទឹកចិត្តយើងឱ្យទទួលបានជោគជ័យលើកិច្ចការអ្វីមួយ ។

តែទោះជាយ៉ាងនេះក្តី សេចក្តីវិនាសក៏អាចកើតមានឡើងដល់ខ្លួនផងដែរបើយើងរាប់អានមិត្តមិនល្អ ។ អាស្រ័យហេតុនេះ បើយើងមិនចង់ជួបក្តីវិនាសទេ យើងគប្បីរាប់អានមិត្តល្អៗ មិត្តមិនប្លម ។ ក្នុងអត្ថបទនេះខ្ញុំនិងលើកឡើងនូវលក្ខណៈមិត្តប្លម៤ចំណុចដែលមានក្នុងគម្ពីរព្រះពុទ្ធសាសនាមកបង្ហាញឱ្យបានដឹង និងបានជៀសវាងនូវមិត្តប្លមៗ ។

១.មិត្តគិតតែប្រយោជន៍ខ្លួន យើងអាចពិនិត្យមើលលក្ខណៈមិត្តដែលគិតតែប្រយោជន៍ខ្លួនជាធំ យើងគប្បីដឹងថា មិត្តប្រភេទនេះមិនអាចជួយយើងពេលយើងមានទុក្ខលំបាកបានទេ ព្រោះតម្លៃនៃការរាប់អានរបស់គេគឺផលប្រយោជន៍ បើមិនមានផលប្រយោជន៍ទេគឺគេមិនរាប់អានយើងសោះឡើយ។

២.មិត្តល្អតែសម្តី សម្តីគឺជាការតាក់តែងនិយាយ នរណាក៏អាចរៀបពាក្យពេចន៍និយាយស្តីបានដែល តែទង្វើរបស់មនុស្សគឺពិបាករៀបណាស់ ហេតុនេះ ចូលកុំសេពគប់មិត្តណាដែលល្អបានតែសម្តី ពេលមានទុក្ខមែនទែនគេមិនអាចជួយយើងបានទេ។

៣.មិត្តនិយាយចាក់បណ្តោយ មិត្តប្រភេទនេះ ទោះបីយើងគិតខុស និងយាយខុសក៏គេនៅតែចាក់បណ្តោយយើងដែរ មិនជួយកែលម្អយើងទេ បើនៅរាប់អានគឺប្រាកដជានាំឱ្យយើងវិនាសជាមិនខាន។

៤.មិត្តដែលចូលចិត្តក្នុងផ្លូវខុស មិត្តនេះចូលចិត្តបបួលយើងចូលខារ៉ាអូខេ លេងល្បែង ល្បែងស្រី ល្បែងស្រា កាលបើនៅរាប់អានជាមួយមិត្តប្រភេទនេះ នោះនិងនាំឱ្យយើងដល់នូវសេចក្តីវិនាស វិនាសទ្រព្យ វិនាសកិត្តិយស និងខូចសុខភាពថែមទៀតផង ។

ទាំង៤នេះជាចំនុចឱ្យយើងបានដឹង និងបានវិនិច្ឆ័យលើលក្ខណៈរបស់មិត្តប្លមបាន។

អត្ថបទដោយ៖ សាក់ គឹមហ៊ាង