ស្ពានអូរកញ្ចុះ ស្ថិតនៅឃុំអំពិលប្រាំដើម ស្រុកបវិល ខេត្តបាត់ដំបង បានបាក់ស្រុតចុះទាំងស្រុង នៅព្រឹកថ្ងៃទី ១៥ ខែតុលានេះ ដោយសារទឹកជំនន់។

តាមរយៈអាខោនហ្វេសប៊ុកឈ្មោះ«ពូការ៉េបួន» បានឲ្យដឹងដូច្នេះថា«បងប្អូន អ្នកធ្វើដំណើរពីស្រុកបវេលមកស្រុកសំពៅលូន មេត្តាជ្រាបថា ស្ពានអូរកញ្ចុះស្រុកបវេល ត្រូវបានទឹកហូរច្រោះស្រុតបាក់ហើយ មិនអាចធ្វើដំណើរឆ្លងកាត់បានទេ»។

បន្ទាប់ពីស្ពានបាក់ភ្លាមៗ កម្លាំងកងទ័ពយោធភូមិភាគទី៥ បានចុះអន្តរាគមន៍ដឹកថ្មមិចចាក់សំរាប់ធ្វើដំណើរបណ្ដោះអាសន្ន។ «បងប្អូនដែលត្រូវធ្វើដំណើរតាមផ្លូវ៥៧B (ពីបវេល-សំពៅលូន) អាចធ្វើដំណើរឆ្លងកាត់បានហើយ តែបានតែរថយន្តធុនតូចទេ»។ នេះជាការបញ្ជាក់បន្ថែមរបស់អាខោនហ្វេសប៊ុក ពូការ៉េបួន៕ដោយ៖ សុផល