ខេត្តតាកែវកំពុងមានតម្រូវការបន្ទាន់នូវកម្លាំងពលកម្មប្រមាណ ១៤,០០០ នាក់ ដើម្បីបំពេញតម្រូវការរោងចក្រ សហគ្រាសក្នុងស្រុក។ នេះគឺជាដំណឹងដ៏ល្អសម្រាប់ពលករ-ពលការិនី ដែលកំពុងស្វែងរកការងារធ្វើ។ នេះបើតាមអត្ថន័យនៃការសារបង្ហោះដោយ អភិបាលខេត្តតាកែវ​ ឯកឧត្ដម​ វ៉ី​ សំណាង​ បានបង្ហោះសារនៅលើទំព័រហ្វេសបុកផ្លូវការរបស់លោក​ នៅថ្ងៃសុក្រ​ ទី១៣​ ខែមិថុនា​ ឆ្នាំ២០២៥នេះ។ ​

បើតាមការបញ្ជាក់របស់ឯកឧត្តម​ វ៉ី​ សំណាង​ ក្នុងឆមាសទី១ ឆ្នាំ២០២៥ នេះ ខេត្តតាកែវនឹងមានរោងចក្រ សហគ្រាសថ្មីចំនួន ២៣ កន្លែង ដែលបានបោះទុនវិនិយោគប្រមាណ ៧៥ លានដុល្លារអាមេរិក ហើយអាចផ្ដល់ឱកាសការងារសរុបដល់ទៅ ១៥,០០០ កន្លែង។

ជាក់ស្តែង នេះសបញ្ជាក់ឱ្យឃើញពីសក្ដានុពលរីកចម្រើននៃវិស័យឧស្សាហកម្មនៅខេត្តតាកែវ និងតម្រូវការកើនឡើងឥតឈប់ឈរចំពោះកម្លាំងពលកម្ម។ ជាមួយគ្នានេះ ឯកឧត្ដម​ បន្តថា​ សម្រាប់ប្រជាពលរដ្ឋដែលមានចំណាប់អារម្មណ៍ចង់បម្រើការងារនៅខេត្តតាកែវ សូមកុំបង្អង់យូរផងដែរ៕