ថៅកែហាងពេជ្រ លោកស្រី ទ្រី ដាណា បានប្រកាសផ្ដល់ការងារជាច្រើនប្រភេទជូនដល់បងប្អូនខ្មែរដែលវិលមកពីប្រទេសថៃ ដោយបច្ចុប្បន្នលោកស្រីកំពុងតែរត់ការដើម្បីបើករោងចក្រគ្រឿងសម្អាងស្តង់ដារនៅកម្ពុជា ក្នុងគោលបំណងបង្កើតទីផ្សារក្នុងស្រុកជូនបងប្អូនខ្មែរយើង ហើយក៏មិនចង់នាំចូលពីក្រៅប្រទេស។

នេះបើយោងតាមសំណេររបស់ លោកស្រី ទ្រី ដាណា បានបញ្ជាក់បែបនេះថា៖ «សម្រាប់បងប្អូន ដែលវិលមកពីប្រទេសថៃវិញ នាងខ្ញុំមានការងារផ្ដល់ជូនច្រើនប្រភេទ ហើយខ្ញុំក៏នឹងខំប្រឹងប្រែងជួយបងប្អូនខ្មែរដូចគ្នា ដោយសារការឈ្លានពាន មើលងាយពីក្រុមជ្រុលនិយមថៃមួយចំនួន យើងត្រូវតែរឹងមាំខ្លួនឯង។ គាំទ្រចំណាត់ការរាជរដ្ឋាភិបាល និងថ្នាក់ដឹកនាំកម្ពុជាជានិច្ច នាងខ្ញុំបានរត់ការសុំច្បាប់ដើម្បីបើករោងចក្រគ្រឿងសម្អាងស្តង់ដារនៅកម្ពុជាមួយរយៈហើយ ក្នុងគោលបំណងបង្កើតទីផ្សារក្នុងស្រុកជូនបងប្អូនខ្មែរយើង ហើយក៏មិនចង់នាំចូលពីក្រៅប្រទេស សង្ឃឹមថានឹងទទួលបានការអនុញ្ញាតឆាប់ៗនេះ»។ 

លោកស្រីក៏បានបន្ថែមថា៖ «នេះជាពេលវេលាដែលយើងរឹងមាំដោយខ្លួនឯង ជួយគាំទ្រ និងប្រើប្រាស់ផលិតផលក្នុងស្រុក ជាពិសេសកសិផលខ្មែរយើង ទាំងបន្លែ ផ្លែឈើ និងរបស់របរប្រើប្រាស់ផ្សេងទៀត ជួយសេដ្ឋកិច្ចជាតិផង និងផ្ដល់ការងារដល់បងប្អូនខ្មែរយើងផងដែរ»៕ Bអត្ថបទដោយ៖ Sun Darasy