តើ 5S អាចជួយអ្នកក្នុងការគ្រប់គ្រងការងារ នៅកន្លែងធ្វើការបានយ៉ាងដូចម្ដេច?វិធីសាស្រ្តរៀបចំក្នុងកន្លែងការងារ របស់ជនជាតិជប៉ុន

តើអ្នកតែងតែមិនពេញចិត្ត ឬខកចិត្តក្នុងការធ្វើការប្រចាំថ្ងៃរបស់អ្នកមែនទេ? អ្នកតែងមានអារម្មណ៍ថាមុខតំណែងនៃការងាររបស់អ្នក គឺហត់ណាស់ , អ្នកតែងតែមិនចាំពីអ្វី ដែលត្រូវធ្វើបន្ទាប់, អ្នកពិបាកក្នុងការរកឯកសារ, ពេលវេលាគឺ មិនគ្រប់គ្រាន់ក្នុងការសម្រេចការងាររបស់អ្នកទេ, អ្នកតែងតែបង្កើតនូវកំហុសដដែលៗ។ បើអ្នកតែងជួបបញ្ហាទាំងអស់នេះ ហើយដំណោះស្រាយគ្មានប្រសិទ្ធិភាព អាចមកសាកល្បងជាមួយវិធីសាស្រ្តរៀបចំការងារ/ កន្លែងការងាររបស់ជនជាតិជប៉ុននេះបាន (5S) ។

ថ្ងៃនេះ Hope ចង់ណែនាំអ្នកទាំងអស់គ្នាវិធីសាស្រ្តរៀបចំការងារ/ កន្លែងការងាររបស់ជនជាតិជប៉ុន (5S)​​ ដែលបង្កើត និងប្រើប្រាស់ដោយប្រជាជនជប៉ុន។ តើហេតុអ្វីបានជាអ្នកគួរប្រើតែប្រើប្រាស់វិធីសាស្រ្តនេះ? វិធីសាស្ត្រនេះ ជួយអោយអ្នកកំណត់អត្តសញ្ញាណ និងកាត់បន្ថយ ព្រមទាំងលុបបំបាត់នូវសម្ភារៈ ក៏ដូចជាការងារមិនចាំបាច់ / មិនត្រូវការ, ពង្រឹងការងារជាក្រុម, បង្កើនប្រសិទ្ធភាពនៃប្រតិបត្តិការ ក្នុងបរិយាកាសការងារល្អប្រសើរនឹង បង្កើតគំរូកម្រិតខ្ពស់មូលដ្ឋានសម្រាប់ផលិតភាពនិងគុណភាពឱ្យមានភាពប្រសើរឡើង។

5S បានមកពីពាក្យដែលផ្តើមពីអក្សរ s ចំនួន៥ ពាក្យគឺ ៖ ​ ១. Seiri (整理) ឬ SORT  គឺការរៀបចំ និង តម្រៀបតាមរបស់របរទាំងអស់នៅក្នុងទីតាំងមួយ ហើយដករបស់របរដែលមិនចាំបាច់ និងត្រូវការចេញពីទីតាំងធ្វើការ។ ដើម្បីកាត់បន្ថយពេលវេលាស្វែងរកវត្ថុ ឬសម្ភារៈ ដោយការកាត់បន្ថយចំនួនរបស់របរដែលមិនចាំបាច់។ បង្កើតកន្លែងទំនេរ សម្រាប់ដាក់សម្ភារៈដែលមានប្រយោជន៍ផ្សេងទៀត។ អ្នកគួរបែងចែកសម្ភារៈ នៅកន្លែងធ្វើការរបស់អ្នកទៅជាបីប្រភេទគឺ សម្ភារៈចាំបាច សម្ភារៈដែលមិនចាំបាច់​ ពេលខ្លះចាំបាច់និង សម្ភារៈមិនចាំបាច់ ​​ រួចដាក់“ ស្លាកក្រហម” ដើម្បីសម្គាល់របស់របរដែលមិនចាំបាច់ រួចរៀបចំទុកក្នុងបន្ទប់សម្ភារៈ ឬអាចលក់អេតចាយ សម្រាប់របស់របរណាដដែលខូចខាត។ ស្លាកលឿងសម្រាប់សម្ភារៈដែលមិនចាំបាច់និង ពេលខ្លះចាំបាច់ និង ស្លាកខៀវសម្រាប់សម្ភារៈចាំបាច់។

២. Seiton (整頓), SET IN ORDER​​ គឺរៀបចំសម្ភារៈចាំបាច់អោយមានសណ្តាប់ធ្នាប់ និងលក្ខណៈជាប្រព័ន្ធ​ ដាក់របស់របរជាសំណុំផ្អែកលើមុខងាររបស់វា ដូច្នេះអ្នកអាចយក និងរកឃើញសម្ភារៈដែលអ្នកចង់ប្រើបានយ៉ាងលឿន និងងាយស្រួល ព្រមទាំងកាត់បន្ថយពេលវេលាក្នុងការស្វែងរក ។ អ្នកគួររៀបចំសម្ភារៈ/ ឧបករណ៍ទាំងអស់ស្ថិតនៅកន្លែងងាយ នឹងតាមលំដាប់លំដោយដែលសមស្របទៅនឹងការងារដែលបានអនុវត្ត។ ដាក់សម្ភារៈ យោងទៅតាមការប្រើប្រាស់វា ដោយរបស់ដែលត្រូវបានប្រើជាញឹកញាប់ នៅជិតកន្លែងធ្វើការ។ប្រើផ្លាកសញ្ញាឬការណែនាំឱ្យបានច្បាស់លាស់ដើម្បីងាយស្រួលរក្សាទុកនៅកន្លែងដើមបន្ទាប់ពីប្រើប្រាស់រួច។

៣. Seisō (清掃),  SHINE​ គឺសម្អាតនិងពិនិត្យមើលកន្លែងធ្វើការយ៉ាងហ្មត់ចត់ និងជាប្រចាំដើម្បីកុំឱ្យមានធូលីនៅជាន់ម៉ាស៊ីនឬឧបករណ៍។ ការធ្វើបែបនេះគឺបង្កើតភាពម្ចាស់ការ របស់បុគ្គលម្នាក់ និងធ្វើឱ្យប្រសើរឡើងនូវប្រសិទ្ធភាពផលិតកម្ម កាត់បន្ថយកាកសំណល់ ការពារកំហុសនិងគុណវិបត្តិ។ រក្សាកន្លែងធ្វើការឱ្យស្អាតនិងរីករាយ ងាយស្រួលធ្វើការ។

៤. Seiketsu (清潔), STANDARDIZE​​ គឺរក្សាស្តង់ដារការងារខ្ពស់ រៀបចំឱ្យមានសណ្តាប់ធ្នាប់និងមានរបៀបរៀបរយគ្រប់ពេលវេលា។​ រៀបចំអោយមាន S1 ដល់ S3 និងអនុវត្តតាមរបៀបដូចគ្នានៅទូទាំងស្ថាប័ន។ ផ្តល់ឱកាសដល់បុគ្គលិកឱ្យចូលរួមយ៉ាងសកម្ម ក្នុងការរក្សាស្តង់ដារ នេះ។ បង្កើតនីតិវិធី និងកាលវិភាគដើម្បីធានាការអនុវត្តន៍នូវ S ទាំង ៣ ។ បង្កើតរចនាសម្ព័ន្ធការងារដែលនឹងគាំទ្រការអនុវត្ត S ទាំង ៣ ព្រមទាំងធ្វើឱ្យវាក្លាយជាផ្នែកនៃទម្លាប់ប្រចាំថ្ងៃ។ ត្រូវប្រាកដថាមនុស្សគ្រប់គ្នាដឹងពីទំនួលខុសត្រូវរបស់ពួកគេក្នុងការអនុវត្តការរៀបចំចាត់ចែងនិងសំអាត។

ប្រើរូបថត ដើម្បីជួយរក្សាអ្វីៗគ្រប់យ៉ាងឱ្យបានត្រឹមត្រូវ និងតាមទីតាំងដើម។ ពិនិត្យឡើងវិញនូវស្ថានភាពនៃការអនុវត្ត 5S ជាទៀងទាត់ដោយប្រើបញ្ជីត្រួតពិនិត្យ។ ​៥. Shitsuke (躾) SUSTAIN ឬនិរន្តរភាពគឺជាដំណើរការ ដែលត្រូវបានអភិវឌ្ឍ ទៅជាវិន័យ ជាទម្លាប់ផ្ទាល់ខ្លួនរបស់បុគ្គល។ និយាយអោយចំទៅ "ធ្វើដោយមិនត្រូវបានគេប្រាប់" ។​​​​​​​​​​​​​​​​​​​​​​​​​​ ជារួម ការរៀបចំការងារ និងកន្លែងការងារ គឺពិតជាសំខាន់ណាស់សម្រាប់មនុស្សគ្រប់គ្នាពីព្រោះ អាចជួយអោយយើងគ្រប់គ្រងស្ថានភាពការងារបានយ៉ាងប្រសើរ កន្លែងធ្វើការកាន់តែស្អាតនិងរៀបចំបានល្អជាងមុន ជួយបង្កើនការបង្កើតគំនិតកាន់តែប្រសើរឡើង កាត់បន្ថយការប្រើប្រាស់ពេលវេលានូវសកម្មភាពណាមមិនចាំបាច់ ពុំសូវមានកំហុសដដែលៗ មានវិធីសាស្រ្តច្បាស់លាស់ និងមានស្តង់ដារជាងមុន ក៏ដូចជាបង្កើតនូវទម្លាប់ល្អក្នុងការធ្វើការ និងក្នុងការសិក្សារៀនសូត្រ និងការងារផ្ទះជាដើម។ អត្ថបទដើមដោយ៖​ ក្តីសង្ឃឹម- Hope