​ កាលពីព្រេងនាយ​ មានយាយចាស់ម្នាក់កំពុងតែទូលចេកមួយល្អីយកទៅលក់នៅឯផ្សារ​​ ក៏ស្រាប់តែគាត់បានប្រទះឃើញទន្សាយមួយក្បាលធ្វើពុតជាស្លាប់នៅលើដងផ្លូវ។​ គាត់ឃើញដូច្នេះក៏លើកដាក់ទន្សាយនោះចូលក្នុងល្អីចេករួចបន្តដំណើរទៅមុខទៀត។

គាត់ដើរបណ្តើរត្រេកអរបណ្តើរក្នុងចិត្តគិតថាយកទន្សាយទៅស្លម្ជូរគ្រឿងហើយថ្ងៃនេះ។

​​ រីឯទន្សាយវិញកាលបើបានយាយដាក់ចូលក្នុងល្អីហើយ ក៏សម្ងំបកស៊ីចេកយ៉ាងឆ្ងាញ់មាត់។ លុះស៊ីចេកអស់មួយល្អីហើយក៏ប្រញាប់ហក់ចេញពីល្អីបោលចូលក្នុងព្រៃបាត់។

ពេលយាយទៅដល់ផ្ទះក៏ដាក់ល្អីចុះ គាត់ឃើញតែសំបកចេក​​ទន្សាយក៏បាត់​​ ទើបភ្ញាក់ខ្លួនថា​​ គាត់ចាញ់បោកទន្សាយកំហូចនោះ។​ យាយគិតស្តាយហើយនិយាយថា "របស់ដែលបានមកដោយស្រួលពេក អាចនាំក្តីវិនាសដល់ខ្លួន" ។ ឥលូវបាត់ទាំងទន្សាយ​ អស់ទាំងចេកទៀត៕ ចប់៕

តម្លៃអប់រំនៅក្នុងរឿងនេះគឺចង់អោយយើងគ្រប់ៗគ្នាកុំមានចិត្តលោភលន់ពេកព្រោះអាចវិនាសដល់ខ្លួនឯងបាន៕