តំបន់សួនផ្កាថ្ម នៅក្រោមបាតសមុទ្ររបស់កម្ពុជាពិតជាមានទេសភាពស្រស់ស្អាត និងទាក់ទាញយ៉ាងខ្លាំង គ្រាន់តែបានឃើញរូបភាពបែបនេះ មានអារម្មណ៍ថាស្រស់ស្រាយទៅហើយ ចុះទម្រាំតែបានងូតទឹកទៅទស្សនាកម្សាន្តលេង ដោយផ្ទាល់នៅក្រោមបាតសមុទ្រទៀតនោះ មិនដឹងជាប្លែកភ្នែក និងមានអារម្មណ៍ស្រស់ស្រាយសប្បាយរីករាយយ៉ាងណាទេ។

បើយោងតាមរបាយការណ៍ពីស្ថានភាពបរិស្ថាន និងសេដ្ឋកិច្ចសង្គមតំបន់ឆ្នេរសមុទ្រកម្ពុជាបានឱ្យដឹងថា បច្ចុប្បន្ននេះ ប្រទេសកម្ពុជាមានតំបន់ផ្កាថ្ម នៅក្នុងដែនសមុទ្ររបស់ខ្លួនទំហំ ២៨០៦ ហិកតា ក្នុងនោះខេត្តកែបមានតំបន់ផ្កាថ្មទំហំ ៥២,៥ ហិកតា, ខេត្តកំពតមានតំបន់ផ្កាថ្មទំហំ ៩៥៣ ហិកតា ,ខេត្តព្រះសីហនុមានតំបន់ផ្កាថ្មទំហំ ១១៩៨ ហិកតា និងខេត្តកោះកុងមានតំបន់ផ្កាថ្មទំហំ ៦០២ ហិកតា។

ទិន្នន័យនេះ ត្រូវបានក្រសួងបរិស្ថានបញ្ជាក់ថា អាចមានការកើនឡើងទៀត ព្រោះនៅមានតំបន់មួយចំនួន នៅមិនទាន់បានសិក្សាស្រាវជ្រាវនៅឡើយពីវត្តមានផ្កាថ្មនេះទេ ៕