ខេត្តបាត់ដំបង៖ ប្រជាកសិករដាំដំណាំពោតជាច្រើននាក់ បានលើកគ្នាទៅតវ៉ាត្រង់ចំណុចគោលដៅឈរជើងក្រុមជញ្ជីងចល័ត ដើម្បីស្នើសុំការសម្របសម្រួល និងដំណោះស្រាយចំពោះបញ្ហាឃាត់រថយន្តដឹកទំនិញរបស់ថៃ បណ្តាលឱ្យមានការកកស្ទះទំនិញមិនអាច ចរាចរណ៍ចេញចូលបាន។

ការប្រមូលផ្តុំគ្នានៅទីតាំងជញ្ជីងចល័តនេះ គឺនៅលើផ្លូវជាតិលេខ៥៩ ខណ:ដែលរថយន្តថៃកំពុងធ្វើសកម្មភាពសម្រុកដឹកកសិកផលខ្មែរលើស​ទម្ងន់​ចូលក្នុងប្រទេសថៃ ស្ទើរគ្រប់រថយន្ត។

សម្រាប់ការចុះអនុវត្តរបស់ក្រុមមន្ត្រីជំនាញជញ្ជីងចល័តខាងលើនេះ បានបង្ក​ឱ្យមានការភ្ញាក់ផ្អើលដល់ប្រជាពលរដ្ឋខ្មែរ ក៏ដូចជាម្ចាស់​សៃឡូដែលទទួល​ទិញពោតស្តុប ដើម្បីលក់បន្តឲ្យខាងថៃ។ ជាមួយគ្នានេះការឃាត់រថយន្តដឹកទំនិញរបស់ថៃក៏បានបង្កឲ្យមានការកកស្ទះរថយន្តជាច្រើនគ្រឿងផងដែរ ខណៈមន្ត្រីជំនាញជញ្ជីងចល័ត តម្រូវឱ្យចាប់យករថយន្តថៃណា ដែលដឹកលើសទម្ងន់យកទៅពិន័យនៅខេត្តបាត់ដំបង។

ឡែកសម្រាប់ប្រជាពលរដ្ឋ ឬម្ចាស់សាយឡូក៏មានការសម្រួលនិងស្នើសុំឲ្យមន្ត្រីអនុវត្តច្បាប់ធ្វើការពិន័យនៅនិងកន្លែងបានហើយ ព្រោះបើមិនដូច្នេះទេ ខាងភាគីថៃគេនិងមិនចូលមកទិញដំណាំកសិកម្មពោត ដំឡូង សណ្តែកនៅតាមព្រំដែនកម្ពុជាបន្តទៀតឡើយ៕​ចិនចាវ