Chelsea ស្ទើរតែភ្លាត់ចាញ់នៅទឹកដីខ្លួនឯងកាលពីយប់មិញក្រោយលេងស្មើគ្នា ១-១ជាមួយ Wolverhampton ទាំងប្រផុតប្រផើយនៅចុងម៉ោង។

ការប្រកួតនៅកីឡដ្ឋាន Stamford Bridge ក្រុមតោខៀវត្រូវគូប្រជែងនាំមុខមុននៅនាទី៥៦ រកគ្រាប់បានដោយកីឡាករ Jiménez ប៉ុន្តែម្ចាស់ផ្ទះមានសំណាងស្រោចស្រង់ពិន្ទុបានវិញក្រោយ Hazard ទាត់មួយជើងយ៉ាងល្អពីតំបន់ដំបូលទូកបញ្ចូលទីបានសម្រេចនៅនាទី៩០+២។

លទ្ធផលស្មើគ្នានេះធ្វើឲ្យ Chelsea ខកខានឡើងទៅលេខ៥បើទោះជា Manchester United ចាញ់ Arsenal ២-០ ក៏ដោយ ប៉ុន្តែពួកគេក្រោមបិសាចក្រហមតែ១ពិន្ទុប៉ុណ្ណោះ គឺ៥៧ ទល់នឹង៥៨។ ប្រកួតក្រោយ Chelsea ត្រូវធ្វើដំណើរទៅទឹកដី Goodison Park សួរសុខទុកម្ចាស់ផ្ទះ Everton៕