រូបសំណាកព្រះលោកេស្វរៈ ដែលថតបានដោយអាណាព្យាបាលបារាំងកាលពីជិត ១០០ឆ្នាំមុន (ឆ្នាំ១៩២៦-២០២២) តាមពិតមិនបានបាត់បង់ទៅណាទេ គឺមានសំណាងរួចផុតពីការជួញដូររបស់ឈ្មួញទុច្ចរិត និងរក្សាទុកនៅអភិរក្សដ្ឋានអង្គរ ខេត្តសៀមរាប។

ដើម្បីអបអរទិវាវប្បធម៌អឺរ៉ុប អភិរក្សដ្ឋានអង្គរដ៏ល្បីល្បាញបានបើកទ្វារឲ្យអ្នកស្រាវជ្រាវ និងភ្ញៀវទេសចរជាតិ និងអន្តរជាតិចូលទស្សនា ពេញ១ថ្ងៃនៅថ្ងៃទី ១៧ ខែកញ្ញានេះ។ អភិរក្សដ្ឋានអង្គរគឺជាស្ថាប័នមានភារកិច្ចជួសជុល និងថែរក្សាវត្ថុបុរាណ រូបចំលាក់នានានៅក្នុងខេត្តសៀមរាប ដែលបង្កើតឡើងដោយបារាំង។

យោងតាមឯកសាររូបថតរបស់សាលាបារាំងចុងបូព៌ា ថតទុកជាឯកសារគឺមានរូបសំណាកច្រើនណាស់ដែលបានបាត់បង់ដោយសារជួញដូរនៅសម័យសង្គ្រាម ហើយមួយចំនួនរក្សាទុកតាមសារមន្ទីរនានា និងខ្លះទៀតត្រូវបានយកទៅលាក់ក្នុងអភិរក្សដ្ឋានអង្គរនេះតែម្ដង។ តួយ៉ាងព្រះលោកេស្វរៈនេះ មនុស្សជាច្រើនគិតថាប្រហែលជាបាត់បង់ទៅហើយ តែតាមពិតគឺកំពុងលាក់ខ្លួន ពីភ្នែកភ្ញៀវទេសចរនៅអភិរក្សដ្ឋានអង្គរសោះ។

រូបសំណាកព្រះលោកេស្វរៈ មានកម្ពស់ ៣ម៉ែត្រ និង ៦០សង់ទីម៉ែត្រ ត្រូវបានយកចេញពីប្រាសាទភ្នំបី ខេត្តសៀមរាប ឆ្លាក់នៅចុងសតវត្សទី១២ និងដើមសតវត្សទី១៣ យកទៅទុកនៅអភិរក្សដ្ឋានអង្គរអំឡុងទសវត្ស ៦០ មានលេខចុះបញ្ជី DCA5740៕ 

អត្ថបទ៖ WowCambodian/ រូបថត៖ CTTO