វិទ្យាល័យមួយនៅកំពត បណ្តុះជំនាញកសិកម្ម ដោយនាំសិស្សដាំបន្លែ និងធ្វើជីធម្មជាតិ

#កសិកម្ម# #សង្គម# #បណ្តុះជំនាញកសិកម្ម# #វិទ្យាល័យសម្ដេច ហ៊ុន សែន អង្គសុរភី# #ខេត្តកំពត#

4512

រូបភាពពីហ្វេសប៊ុកផេក វិទ្យាល័យសម្ដេច ហ៊ុន សែន អង្គរសុរភី

ភ្នំពេញ៖ វិទ្យាល័យសម្ដេច ហ៊ុន សែន អង្គសុរភី ដែលស្ថិតក្នុងភូមិអង្គសុរភី ឃុំអង្គសុរភី ស្រុកកំពង់ត្រាច ខេត្តកំពត កំពុងបណ្តុះគំនិតធ្វើកសិកម្មដល់សិស្សថ្នាក់ទី១១ និងទី១២ ដោយការដឹកនាំពួកគេ រៀបចំសួនដាំដុះបន្លែសុវត្ថិភាព និងធ្វើជីធម្មជាតិ នៅក្នុងបរិវេណសាលា។

រយៈពេលជាង៣ខែហើយ ដែលគ្រូបង្រៀននៃវិទ្យាល័យសម្ដេច ហ៊ុន សែន អង្គសុរភី បាននាំសិស្សថ្នាក់ទី១១-១២ ដាំបន្លែសុវត្ថិភាពក្នុងផ្ទះសំណាញ់។ លោក ម៉េង អាន់ នាយកស្ដីទីវិទ្យាល័យអង្គសុរភី បានប្រាប់សារព័ត៌មានថ្មីៗថា កន្លងមក សាលាបានបញ្ជូនគ្រូបង្រៀន២នាក់ ទៅសិក្សាជំនាញកសិកម្មនៅសាកលវិទ្យាល័យភូមិន្ទកសិកម្ម ហើយយកជំនាញនោះ មកបណ្ដុះបណ្ដាលសិស្សក្នុងសាលាវិញ។

រូបភាពពីហ្វេសប៊ុកផេក វិទ្យាល័យសម្ដេច ហ៊ុន សែន អង្គរសុរភី

បច្ចុប្បន្ន សាលាមានរោងដាំបន្លែសុវត្ថិភាពចំនួន២ សម្រាប់ឱ្យសិស្សអនុវត្តផ្ទាល់នៅរៀងរាល់ថ្ងៃសុក្រ រយៈពេល១ម៉ោង ដែលចាត់ទុកជាមេរៀនកសិកម្ម និងបំណិនជីវិត។ «គ្រូនាំសិស្សដាំបន្លែ ក្នុងម៉ោងកសិកម្ម ក្នុងម៉ោងសិក្សាហ្នឹង។ ដូចថ្នាក់ទី១២អ៊‍ីចឹង មាន៣៤ម៉ោង មានម៉ោងកសិកម្ម១ម៉ោង ហើយថ្នាក់ទី១១ មាន៣៣ម៉ោង មានម៉ោងកសិកម្ម១ម៉ោងអ៊‍ីចឹងទៅ។ ជាទូទៅ យើងរៀបឱ្យមានម៉ោងកសិកម្ម១ម៉ោង ក្នុងមួយសប្ដាហ៍»។ នេះជាការលើកឡើងរបស់ លោកគ្រូ ម៉េង អាន់។

ដំណាក់កាលដំបូងលោកគ្រូ-អ្នកគ្រូ បាននាំសិស្សឱ្យដាំស្ពៃចង្កឹះ និងដាក់លក់បានប្រាក់ប្រមាណជាង៦០ម៉ឺនរៀល និងបន្តទៅដំណាក់កាលទី២ ដោយគ្រោងដាំស្ពៃក្រញាញ់ម្ដង។ ថវិកាដែលបានពីលក់បន្លែនោះ មួយចំនួនត្រូវផ្ដល់ជូនទៅគ្រូបង្គោល មួយចំនួនទៅសិស្ស និងមួយចំនួនទៀតឱ្យទៅសាលា។ ក្រៅពីការដាំដំណាំ គ្រូបង្គោលក៏បង្រៀនសិស្សពីរបៀបធ្វើជីកំប៉ុស ជីធម្មជាតិ និងបច្ចេកទេសកសិកម្មផ្សេងៗផងដែរ។

រូបភាពពីហ្វេសប៊ុកផេក វិទ្យាល័យសម្ដេច ហ៊ុន សែន អង្គរសុរភី

លោកនាយកវ័យ៥០ប្លាយរូបនេះ ចាត់ទុកការដាំដំណាំ ជាកត្តាសំខាន់មួយក្នុងសហគមន៍។ ការបង្កើតសួនដាំបន្លែក្នុងបរិវេណសាលានេះ ក៏ដើម្បីបណ្ដុះគំនិតឱ្យគ្រូ និងសិស្សចេះធ្វើកសិកម្ម, អាចស្វែងយល់ពីកសិកម្ម, ផ្ដល់សោភ័ណភាពស្រស់ស្អាតក្នុងសាលា និងចូលរួមថែរក្សាបរិស្ថាន។ ម្យ៉ាងសកម្មភាពធ្វើកសិកម្មរួមគ្នានេះ ក៏បង្ហាញពីសាមគ្គីភាព ទំនាក់ទំនងរវាងគ្រូ និងសិស្ស ដោយផ្ដល់ប្រយោជន៍មួយផ្នែកដល់សាលា។ ក្រៅពីសិស្សកំពុងសិក្សាក្នុងសាលា សិស្សផ្អាកការសិក្សា និងពលរដ្ឋក្នុងសហគមន៍ ក៏បាន ចូលរួមរៀនពីបច្ចេកទេសកសិកម្មនានា ពីគ្រូបង្គោលក្នុងសាលាផងដែរ៕

ប្រភពដើម៖ Thmey Thmey

ព័ត៌មានជាតិ

73855មាតិកា

សេចក្តីថ្លែងការណ៍លើកលែង

អត្ថបទនេះបានមកពីអ្នកប្រើប្រាស់របស់ TNAOT APP មិនតំណាងឱ្យទស្សនៈ និងគោលជំហរណាមួយរបស់យើងខ្ញុំឡើយ។ ប្រសិនបើមានបញ្ហាបំពានកម្មសិទ្ធិ សូមទាក់ទងមកកាន់យើងខ្ញុំដើម្បីបញ្ជាក់ការលុប។