របរលក់កាហ្វេនៅរាជធានីភ្នំពេញ ជាហូរហែរកំពុងទទួលបានការចាប់អារម្មណ៍ខ្លាំងទាំងអ្នកទិញ និង អ្នកលក់! ជាក់ស្តែងងាកមកមើលប្តីប្រពន្ធ១គូនេះវិញ ពិតជាពូកែខ្លាំងមែនទែន ច្នៃម៉ូតូរបស់ខ្លួន​បង្កើតរបបលក់កាហ្វេនៅតាមដងផ្លូវ ដោយមិនសង្វាតបើកហាងដែលមានទីកន្លែងធំដុំដូចអ្នកដទៃឡើយ។

អ្នកលក់កាហ្វេដ៏ច្នៃប្រឌិតពីររូបនេះមានប្រព​ន្ធឈ្មោះ ថាវរី និងសា្វមីឈ្មោះ សារាជ បានចាប់ដៃគ្នាបង្កើតតូបកាហ្វេនៅលើម៉ូតូរបស់ខ្លួនដ៏ទាន់សម័យប្រហែលជាជាង ២ខែមកហើយចាប់តាំងបើកលក់ថ្ងៃដំបូង ដែលលក់នៅលើបណ្តោយផ្លូវត្រលោកបែក នៅទល់មុខមជ្ឈមណ្ឌល់ CKCC ដែលបើកលក់ជារៀងរាល់ថ្ងៃ ប៉ុន្តែសម្រាប់ថ្ងៃច័ន្ទដល់សុក្រ លក់តែពេលព្រឹកទេ សម្រាប់ថ្ងៃសៅរ៍-អាទិត្យ គឺបើកលក់ពីម៉ោង៧ព្រឹកដល់ម៉ោង ៥ល្ងាចតែម្តង។ បងស្រីដែលមានទឹកមុខដ៏រួសរាយរូបនេះមានជំនាញជាអ្នកលក់កាហ្វេពីម្តាយ ដែលគាត់លក់ប្រហែលជា១០ឆ្នាំមកហើយ។

មុនពេលសម្រេចចិត្តលក់កាហ្វេនៅលើម៉ូតូបែបនេះអ្នកទាំងពីរយល់ឃើញថា គាត់ក៏ចង់បង្កើតហាងលក់កាហ្វេដូចម្ចាស់ប្រេនធំៗល្បីឈ្មោះនៅក្នុងប្រទេសដែរ ប៉ុន្តែដោយសារតែទំហំទឹកប្រាក់មានកំណត់ ទើបអ្នកទាំងពីរមានគំនិតកែច្នៃបែបនេះដោយស្វែងរកសម្ភារៈណាដែលមានតម្លៃសមរម្យប៉ុន្តែទាន់សម័យ និងប្លែកភ្នែកសម្រាប់អតិថិជន មួយវិញទៀតពួកគាត់ក៏បានគិតពីរសជាតិ តម្លៃ និងសេវាកម្ម ដោយត្រូវតែលឿនបំផុតមិនធ្វើឲ្យអតិថិជនរង់ចាំយូរនោះទេ ដែលជាហេតុបណ្តាលឲ្យមានសន្ទុះគាំទ្រច្រើនពីអតិថិជន​ ទោះបីមិនមានទីតាំងហាងសមរម្យដូចគេក៏ពិតមែន។​

នៅពេលដែលក្រុមការងារសារព័ត៌មាន TNAOT ជួបជាមួយបងស្រី ថាវរី បងស្រីបានលើកឡើងថា ការជ្រើសរើសសម្ភារដែលមានតម្លៃធូរថ្លៃនិងទាន់សម័យគឺពិតជាសំខាន់ណាស់សម្រាប់គាត់ខ្លាំងមែនទែន ជាក់ស្តែងអ្នកទាំងពីរបានបង្ហាញពីដើមទុនដែលយើងដឹងហើយស្ទើរតែនឹកស្មានមិនដល់នៃការបង្កើតរបបមួយនេះទៅដល់មិត្តអ្នកអានថែមទៀតផង។ ពីសារព័ត៍មាន  TNAOT យើងខ្ញុំសូមផ្តល់កម្លាំងចិត្តដល់បងស្រីថាវរី និងបងប្រុស សារាជ ស៊ូ-ស៊ូ and Fighting ណា និងសូមជូនពរឲ្យអ្នកទាំងពីរទទួលបានជោគជ័យទាំងក្នុងអាជីពការងារនិងក្នុងរបបរកស៊ី មិនតែប៉ុណ្ណោះសូមឲ្យមានអតិថិជនគាំទ្រកាន់តែច្រើនឡើងៗផងដែរ៕

សម្រួលអត្ថបទដោយ៖ Puthseyha