ភ្នំពេញ៖ ល្ខោនអូប៉េរ៉ាដ៏ល្បីលើពិភពលោក រឺហៅជាភាសារបរទេសថា Madama Butterfly ត្រូវបានចាក់បញ្ចាំងក្នុងប្រទេសកម្ពុជាជាលើកដំបូងនៅក្នុងសាលមហាស្របកោះពេជ្រកាលពីថ្ងៃទី ១០ ខែធ្នូនេះដែលព្រឹត្តិការណ៍ដ៏អស្ចារ្យនេះមានការចូលរួមពីភ្ញៀវជាតិ អន្តរជាតិ ព្រមទាំងបណ្តាញអគ្គរដ្ឋទូតដែលបានអញ្ចើញចូលរួមទស្សនារួមមានអគ្គរដ្ឋទូតអាម៉េរិក, ជប៉ុន, និងអ៊ីតាលីព្រមទាំងបណ្តាអគ្គរដ្ឋទូតមួយចំនួនទៀតដែលប្រចាំនៅព្រះរាជាណាចក្រកម្ពុជាផងដែរ។ ល្ខោនអូប៉េរ៉ាដ៏ពិសេសនេះគឺជានិមិត្តរូបដ៏អស្ចារ្យរបស់ប្រទេសអ៊ីតាលី ល្ខោនអូប៉េរ៉ា Madama Butterfly ត្រូវបានចេញសម្តែងលើកដំបូងនៅក្នុងឆ្នាំ ១៩០៤ ក្នុងប្រទេសអ៊ីតាលី។ ការបង្កើតនិងសម្តែងល្ខោនដ៏ពិសេសនេះបានឆ្លុះបញ្ចាំងពីប្រពៃណី វប្បធម៌ ដ៏សំបូរបែបរបស់ប្រជាជនអ៊ីតាលី។

រឿង «Madama Butterfly» បានសណ្តំដួងចិត្តទស្សនិកជនជុំវិញពិភពលោក ជាមួយរឿងនិទានពីយូរមកហើយ អំពីស្នេហាតែម្ខាងដោយសាច់រឿងបានបង្ហាញពីចំណងស្នេហារវាងទាហានជើងទឹកអាម៉េរិកម្នាក់មានឈ្មោះថា Pinkerton បានចាប់ចិត្តស្រលាញ់នារីជនជាតិជប៉ុនម្នាក់មានឈ្មោះថា Cio-Cio San (ឈ្មោះហៅក្រៅថា Butterfly) ហើយស្នេហារវាងអ្នកទាំងពីរដំបូងឡើយគឺពោលពេញទៅដោយភាពសប្បាយរីករាយជាខ្លាំងរហូតដល់អ្នកទាំងពីរបានបន្សល់ទុកចំណងដៃកូនប្រុសដ៏សង្ហារម្នាក់ ច្រើនឆ្នាំកន្លងផុតទៅពេលវេលាបានផ្លាស់ប្តូរចំណងស្នេហាស្អិតរមួតរបស់អ្នកទាំងពីរត្រូវឃ្លាតឆ្ងាយពីគ្នា ដោយលោក Pinkerton ត្រូវបានបង្ខំចិត្តទៅសហរដ្ឋអាម៉េរិកវិញដើម្បីបំពេញការងាររបស់លោក រូបលោកបានសន្យាថានិងត្រឡប់មកជួបនាង Cio-Cio San ម្តងទៀតក៏ប៉ុន្តែពាក្យសន្យារបស់លោកបានត្រឹមតែជាសុបិនអាក្រក់សម្រាប់នាង Cio-Cio San តែប៉ុណ្ណោះ នាងមិនបានឃើញរូបលោកត្រឡប់មកតាមសន្យានោះទេ។

ចាប់តាំងពីស្នាដៃឯករបស់អ៊ីតាលីមួយនេះ ត្រូវបានសម្តែងលើកដំបូងនៅឆ្នាំ១៩០៤ មក ការសម្តែងត្រូវបានរៀបចំនៅទូទាំងពិភពលោកក្នុងទម្រង់ផ្សេងៗគ្នា ដោយសារអ្នកដឹកនាំល្បីៗនានាកម្លាយរឿងនិទានដែលមិនចេះចប់នេះ តាមរបៀបរបស់ខ្លួនរៀងៗខ្លួន។ ហើយទីបំផុតរឿង «Madama Butterfly» បានបើកការសម្តែងយ៉ាងអស្ចារ្យជាលើកដំបូងនៅកម្ពុជា រួមសម្តែងដោយក្រុមសិល្បករខ្មែរ អ៊ីតាលី និងជប៉ុន បង្កើតនូវទិដ្ឋភាពដ៏គួរឱ្យចាប់អារម្មណ៍ ដឹកនាំសម្តែងដោយ អ្នកអង្គម្ចាស់ ស៊ីសុវត្ថិ រ៉ាវីវឌ្ឍន៉ា មុនីពង្ស និងអ្នកដឹកនាំសម្តែងជនជាតិអ៊ីតាលីមានឈ្មោះថា Maestro Vincenzo Grisostomi Travaglini។

គួរបញ្ជាក់ថាស្រាបៀរលំដាប់អន្តរជាតិ ABC បានសហការជាមួយ និងអ្នករៀបចំល្ខោនរឿង «ម៉ាដាម៉ា បាធឺផ្លាយ» (Madama Butterfly) ដើម្បីនាំល្ខោនអូប៉េរ៉ាដ៏ល្បីពេញពិភពលោកមកសម្តែងក្នុងប្រទេសកម្ពុជាជាលើកដំបូង។ ព្រឹត្តិការណ៍នេះបានប្រែក្លាយជារាត្រីដែលមិនអាចបំភ្លេចបាន អមដោយតន្រ្តី និងសាច់រឿងពោរពេញដោយមនោសញ្ចេតនា ដែលចូលរួមសម្តែង ដោយតារាជាតិ និងអន្តរជាតិជាច្រើនរូប៕