សម្ដេច ហ៊ុន សែន បានចាត់ទុកថា ទំនាក់ទំនងជាប្រវត្តិសាស្ត្ររវាងប្រទេសទាំងពីរ តម្រូវឱ្យប្រទេសយើងទាំងពីរនៅតែជាដៃគូដ៏ស្មោះត្រង់ជាមួយគ្នា។ នេះបើតាមជំនួបពិភាក្សាការងាររវាង សម្ដេចតេជោ ហ៊ុន សែន និងឯកឧត្តម វ៉ាង វិនពីន (WANG Wenbin) ឯកអគ្គរដ្ឋទូតថ្មី នៃសាធារណរដ្ឋប្រជាមានិតចិន ប្រចាំនៅកម្ពុជា។

ក្នុងឱកាសនោះ សម្តេច ហ៊ុន សែន បានមានប្រសាសន៍ថា «កម្ពុជាបានរក្សាចំណងមិត្តភាពជាប្រពៃណីដ៏ល្អនេះតាំងពីថ្នាក់ដឹកនាំជំនាន់មុន ហើយថ្នាក់ថ្នមថែរក្សាទំនាក់ទំនងនេះឱ្យមានភាពរឹងមាំជារៀងរហូតមក»។

ជាមួយគ្នានោះ ឯកឧត្តម WANG Wenbin ក៏បានបង្ហាញអារម្មណ៍ថា «ពិតមានមហាកិត្តិយសដែលបានចូលជួបសម្ដែងការគួរសមជាមួយសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា។ សម្ដេចតេជោ ជាមិត្តចាស់ មិត្តល្អរបស់ប្រជាជនចិន ក៏ជាអ្នកនយោបាយដែលមានបទពិសោធន៍ច្រើន។ ខ្ញុំរៀនសូត្រច្រើនពី សម្ដេច តេជោ អំពីការអភិវឌ្ឍទំនាក់ទំនងចិននិងកម្ពុជា។ ខ្ញុំមានជំនឿនិងជឿជាក់យ៉ាងមុតមាំថា មិត្តភាពដែកថែបចិននិងកម្ពុជាមុខជានឹងឆ្ពោះទៅដល់កម្រិតថ្មីមួយទៀត»។

ជាទីបញ្ចប់ សម្តេចតេជោ ក៏បានស្នើឱ្យឯកឧត្តមឯកអគ្គរដ្ឋទូតចិន ពាំនាំមកការផ្ដាំផ្ញើសួរសុខទុក្ខរបស់ សម្តេច ជូនចំពោះឯកឧត្តម ប្រធានាធិបតីចិន ស៊ី ជិនពីង និងថ្នាក់ដឹកនាំចិនសំខាន់ៗជាច្រើនទៀត។ សម្តេចតេជោ ប្រធានព្រឹទ្ធសភាបានជូនពរ ឯកឧត្តម WANG Wenbin ឱ្យសម្រេចបានជោគជ័យក្នុងអាណត្តិបេសកកម្មនៅកម្ពុជាផងដែរ៕