ចាប់តាំងតែពីឆ្នាំ២០០២មក អង្គការសត្វព្រៃ និងរុក្ខជាតិអន្តរជាតិ(FFI) បានតាមដាន និងសិក្សាស្រាវជ្រាវ រហូតមកដល់បច្ចុប្បន្ននេះគេបានរកឃើញពងក្រពើភ្នំ ដែលញាស់ជាកូនលក្ខណៈបែបធម្មជាតិមានចំនួន២៣៦ក្បាល ក្នុងនេះកូនក្រពើភ្នំ ដែលធ្វើការបង្កាត់ចាប់តាំងតែពីឆ្នាំ២០១១មក ញាស់បានចំនួនសរុប៤៨៤ក្បាល។

លោក លូ វន្នី ប្រធានកម្មវិធីអភិរក្សដីគោកនៃអង្គការសត្វព្រៃ និងរុក្ខជាតិអន្តរជាតិ (FFI) បានប្រាប់ថាតំបន់ជួរភ្នំក្រវាញ ដែលជាតំបន់ដាច់ស្រយាលរបស់ប្រទេសកម្ពុជាគឺមានវត្តមាន សត្វក្រពើភ្នំច្រើនជាងគេក្នុងចំណោមកន្លែងដទៃទៀត ដូចជាទំបន់ទន្លេស្រែពក ខេត្តមណ្ឌលគិរីជាដើម។

លោកបានប្រាប់ថា ជាង២០ឆ្នាំមកនេះពោលគឺចាប់តាំងតែពីឆ្នាំ២០០២រហូតមកដល់បច្ចុប្បន្នក្នុងការតាមដានពី សំបុកកូនក្រពើភ្នំគេបានរកឃើញមានកូនក្រពើភ្នំញាស់តាមលក្ខណៈធម្មជាតិ សរុបចំនួន២៣៦ក្បាល។ ក្រៅពីនេះសម្រាប់អង្គការសត្វព្រៃ និងរុក្ខជាតិមានស្ថានីយបង្កាត់កូនក្រពើភ្នំនៅសួនសត្វភ្នំតាម៉ៅ ចាប់តាំងតែពីឆ្នាំ២០១១មក ដល់ពេលបច្ចុប្បន្នបានធ្វើការបង្កាត់កូនក្រពើញាស់បានសរុបចំនួន៤៨៤ក្បាល និងក្នុងចំណោមកូនក្រពើទាំងនេះ ក៏បានលែងក្នុងជម្រកធម្មជាតិបាន១៩៦ក្បាលនៅតំបន់ជួរភ្នំក្រវាញនេះផងដែរ។ សម្រាប់ទីតាំងដែលលែងកូនក្រពើភ្នំគឺជាតំបន់ដាច់ស្រយាលខ្លាំងដែលកម្រមានអ្នកណាទៅដល់ណាស់។

សូមបញ្ជាក់ដែរថា ប្រទេសកម្ពុជា គឺជាប្រទេសដែលសំបូរក្រពើភ្នំច្រើនជាងគេនៅលើពិភពលោក។ ក្នុងពិភពលោកក្រពើភ្នំត្រូវបានប៉ាន់ស្មានថាមានចំនួនជាង ១០០០ ក្បាលប៉ុណ្ណោះ ក្នុងនោះប្រទេសកម្ពុជា មានក្រពើភ្នំជាង ៣០០ក្បាលផងដែរ៕