អត្ថបទឆ្លុះបញ្ចាំង លើការអន្តរាគមន៍យោធាក្នុងទំនាក់ទំនងអន្តរជាតិ

(រូបភាពតំណាងក្នុងប្រទេសមីយ៉ាន់ម៉ា) 

ក្នុងបញ្ហាដ៏លំបាកបំផុត មួយផ្នែកចំពោះសកម្មភាពនយោបាយអន្តរជាតិនោះគឺ ការទាក់ទងទៅនឹងដំណោះស្រាយនៃទំនាស់នៅក្នុងប្រទេសណាមួយដោយប្រើប្រាស់នូវកម្លាំងយោធា ច្បាប់ និងសិទ្ធិក្នុងការប្រើប្រាស់កម្លាំងយោធា។ ជាក់ស្តែងក្នុង ប្រទេសភូមាដែលបានកើតមាននូវបាតុកម្មរវាងប្រជាជន ជាមួយនឹងក្រុមយោធាដែលបានធ្វើរដ្ឋប្រហារទម្លាក់រដ្ឋាភិបាលស្របច្បាប់ដែលទទួលស្គាល់ដោយការបោះឆ្នោត។ ស្របជាមួយគ្នានោះដែរ មានការលើកមតិជាច្រើនអំពីការចូលរួមដោះស្រាយលើវិបត្តិភូមានេះ។ មតិមួយចំនួនបានលើកឡើងថាក្នុងនាមជារដ្ឋដែលមានទំនាក់ទំនងជាមួយភូមា ដូចជាអង្គការសហប្រជាជាតិ ឬសមាជិកអាស៊ាន គួរតែមានករណីកិច្ចក្នុងនាមជាប្រទេសសមាជិកក្នុងបណ្តារសហគមន៍អន្តរជាតិ អាចមានសិទ្ធិចូលរួមដោះស្រាយ ក្នុងន័យទប់ស្កាត់លើការគំរាមកំហែងដល់សន្តិសុខ និងស្ថិរភាពអន្តរជាតិ។ ផ្ទុយទៅវិញ មតិខ្លះទៀតត្រូវលើកឡើងក្នុងន័យថាមិនអាចលូកដៃចូលបានទេ ព្រោះវិបត្តិនៅភូមាជាបញ្ហាផ្ទៃក្នុងប្រទេស។ ដូច្នេះ សំណួរមួយលើកឡើងថា តើពេលណាទើបមានតួនាទីយោធាចូលមកអន្តរាគមន៍ក្នុងប្រទេសដែលកំពុងកើតមានបញ្ហាបែបនេះ?

(រូបភាពបាតុកម្មនៅប្រទេសមីយ៉ាន់ម៉ាក្នុងឆ្នាំ២០២១)

គេពិបាកក្នុងការវិនិច្ឆ័យណាស់ទៅអត្ថន័យនៃការប្រើប្រាស់កំលាំងយោធារបស់ប្រទេសមួយ ឬសហគមន៍អន្តរជាតិទៅនឹងប្រទេសមួយទៀត។ បើយោងតាមមាត្រាទី២ នៃលក្ខន្តិកៈអង្គការសហប្រជាតិដែលចែងអំពីសិទ្ធិលូកដៃចូលបញ្ហាផ្ទៃក្នុងរបស់ប្រទេសមួយ លើកលែងតែក្នុងស្ថានភាពអស្ថិរភាពអន្តរជាតិ ឬសង្គ្រាម។ ប៉ុន្តែក្នុងលក្ខខណ្ឌនេះ ត្រូវបានមតិមួយចំនួនយល់ថាកម្លាំងយោធាពីសំណាក់អង្គការ ឬសមាគមន៍អន្តរជាតិនៅតែអាចមាន តាមរយៈសិទ្ធិក្នុងការលូកដៃ ដើម្បីមនុស្សធម៌ចូលទៅបញ្ហាផ្ទៃក្នុង។ ជាក់ស្តែង ក្នុងប្រទេសស៊ូដង់ អង្គការអន្តរជាតិផ្សេងៗ បានធ្វើសកម្មភាពជួយដល់ប្រជាជនស៊ូដង់ ក្រោមការយល់ព្រមរបស់រដ្ឋាភិបាលកាន់អំណាច និងមេដឹកនាំពួកឧទ្ទាមនៃប្រទេសស៊ូដង់។ ចំណែកសូមាលីវិញ រដ្ឋាភិបាលបានប្រឆាំង និងមិនព្រមធ្វើកិច្ចសហប្រតិបត្តិការពីកម្លាំងយោធាអន្តរជាតិឡើយ។

(រូបភាពយោធារបស់ប្រទេសមីយ៉ាន់ម៉ាក្នុងបាតុកម្មឆ្នាំ២០២១)

ជារួមមក ការធ្វើអន្តរាគមន៍យោធាពីសំណាក់ប្រទេសដទៃ ឬសហគមន៍អន្តរជាតិដែលពាក់ព័ន្ធទៅនឹងការលូកដៃចូលក្នុងបញ្ហាប្រទេសមួយផ្សេងទៀតនោះ ត្រូវធ្វើឡើងឲ្យស្របទៅនឹងការយល់ព្រមពីសំណាក់រដ្ឋាភិបាលនៃប្រទេសនោះដែរ។

ស្មេរដោយ: sharer(អ្នកចែករំលែក)

ឯកសារយោង: 

ឈាង បុប្ផា. (2021, ខែមីនា). តើអាស៊ានអាចធ្វើអ្វីខ្លះដើម្បីដោះស្រាយវិបត្តិភូមា?.វិទ្យុបារាំងខេមរភាសា.