មហាជនស្លុតចិត្ត! ក្រោយដឹងដំណឹងថា តារា​សម្ដែង​ស្រី​តៃវ៉ាន់ Barbie Hsu ដែលគ្រប់គ្នាស្គាល់ថា “សាន់ឆាយ”ពេលនេះបានទទួល​មរណភាព​ក្នុង​អាយុ ៤៨​ឆ្នាំ ដោយសារ​ជំងឺ​ផ្ដាសាយ។ ពាក្យចចាមអារ៉ាមអំពីការស្លាប់របស់នាងជាលើកដំបូងបានរីករាលដាលនៅលើអ៊ីនធឺណែតកាលពីថ្ងៃអាទិត្យ (២ ខែកុម្ភៈ) ហើយកាន់តែខ្លាំងឡើងបន្ទាប់ពីអតីតស្វាមីរបស់នាង Wang Xiaofei បានផ្លាស់ប្តូររូបភាពផ្ទាល់ខ្លួនរបស់គាត់នៅលើវេទិកាប្រព័ន្ធផ្សព្វផ្សាយសង្គមរបស់គាត់ទៅជាពណ៌ខ្មៅ។

ទីបំផុតការស្លាប់របស់ Hsu ត្រូវបានបញ្ជាក់ដោយប្អូនស្រីរបស់នាង ដែលជាតារាសម្ដែងតៃវ៉ាន់ Dee Hsu នៅព្រឹកថ្ងៃច័ន្ទនេះថា "សូមអរគុណចំពោះការព្រួយបារម្ភរបស់អ្នកទាំងអស់គ្នា! ក្នុងឱកាសបុណ្យចូលឆ្នាំថ្មី ក្រុមគ្រួសារយើងទាំងអស់គ្នាបានធ្វើដំណើរកម្សាន្តទៅកាន់ប្រទេសជប៉ុន។ បងស្រីជាទីគោរព និងចិត្តល្អរបស់ខ្ញុំ បានទទួលមរណៈភាពជាអកុសល ដោយសារជំងឺរលាកសួតដោយសារជំងឺគ្រុនផ្តាសាយ។ ខ្ញុំពិតជាដឹងគុណមែនទែនដែលមានបងជាបងស្រី មើលថែប្អូន និង ជាដៃគូដ៏ល្អរបស់ប្អូនក្នុងជាតិនេះ ។ ខ្ញុំនឹងដឹងគុណចំពោះបង និងចងចាំបងជារៀងរហូត។

គួររំលឹក Barbie Hsu ត្រូវបានគេស្គាល់ និងកោតសរសើរចំពោះការសម្តែងដ៏ល្អបំផុតរបស់នាងដើរតួរអង្គ Dong Shancai នៅក្នុងរឿងភាគតៃវ៉ាន់ឆ្នាំ២០០១ Meteor Garden ដែលនាងបានសម្តែងជាមួយ Jerry Yan, Vic Chou, Ken Chu, Vanness Wu។ នាងមានកូនពីរនាក់ជាចំណងអាពាហ៍ពិពាហ៍របស់នាងជាមួយអតីតស្វាមីលោក Wang៕