តារា​សម្ដែង​ចិនម្នាក់​ទៀតគឺ​លោក Liang Youcheng បាន​ទទួល​មរណភាព​នៅ​ថ្ងៃ​ទី ៣០ ខែ​មករា ក្នុង​អាយុ ២៧ ឆ្នាំ ដោយ​មាន​ជំងឺ​ផ្ដាសាយ ខណៈការស្លាប់របស់តារាចម្រៀងតៃវ៉ាន់ Barbie Hsu បានធ្វើឲ្យពិភពកម្សាន្តចិនមានការភ្ញាក់ផ្អើលយ៉ាងខ្លាំង។ អ្វី​ដែល​មិន​នឹកស្មាន​ដល់​ជាង​នេះ​ទៀត​នោះ ​គឺ​តារាស្រី Barbie Hsu និង តារាប្រុស Liang Youcheng បាន​ស្លាប់​ដោយសារ​ជំងឺ​ផ្តាសាយ​ដូចគ្នា។

យោងតាមប្រព័ន្ធផ្សព្វផ្សាយចិនដំបូងឡើយ Liang មានរោគសញ្ញាស្រាល ហើយត្រូវបានគេធ្វើរោគវិនិច្ឆ័យថាមានជំងឺផ្តាសាយធម្មតា។ ទោះជាយ៉ាងណាក៏ដោយ ស្ថានភាពរបស់គាត់កាន់តែអាក្រក់ទៅៗ ដែលនាំឲ្យមានការឆ្លងនៃប្រព័ន្ធសរសៃប្រសាទកណ្តាល (CNS) ។ ទោះ​បី​ជា​មាន​ការ​សង្គ្រោះ​បន្ទាន់​ក៏​ដោយ ប៉ុន្តែ​លោក​បាន​ទទួល​មរណភាព​នៅ​ក្នុង​មន្ទីរពេទ្យ​នៅ​ថ្ងៃ​ទី​២​នៃ​ថ្ងៃ​ចូល​ឆ្នាំ​ចិន។ របាយការណ៍​បញ្ជាក់​ថា គ្មាន​សមាជិក​គ្រួសារ​ណា​ម្នាក់​នៅ​មន្ទីរពេទ្យ​ជាមួយ​គាត់​ទេ។

គួររំលឹកផងដែរថា Youcheng ដែលមកពីខេត្ត Sichuan ធ្លាប់បានសម្ដែងក្នុងរឿងភាគជាច្រើន ដែលតែងតែដើរតួជាតួឯក ដូចជាអង្គរក្សជាដើម។ លោកត្រូវបានគេស្គាល់ថា សម្តែងបានល្អបំផុតសម្រាប់តួអង្គក្នុងរឿង My Heart  (២០២១) និង Echo of Her Voice (២០២៤) ។ អ្នកនិយមលេងអ៊ីនធឺណែតសន្និដ្ឋានថា ការស្លាប់របស់តារាសម្តែងរូបនេះអាចបណ្តាលមកពីជំងឺគ្រុនផ្តាសាយប្រភេទ A ដូចទៅនឹង Hsuដែរ ទោះបីជានេះមិនទាន់ត្រូវបានបញ្ជាក់ជាផ្លូវការក៏ដោយ។ ការស្លាប់របស់អ្នកទាំងពីរបានទាក់ទាញការយកចិត្តទុកដាក់ជាថ្មីចំពោះគ្រោះថ្នាក់ដែលអាចកើតមាននៃជំងឺផ្តាសាយ និងផលវិបាកធ្ងន់ធ្ងររបស់វា៕