បណ្ដាអ្នកគាំទ្រនៅតែចងចាំ និងនឹកស្រណោះសម្លេង និងបទចម្រៀងជាច្រើន ដែលតារាចម្រៀងរ៉េប លោក Ruthko បានបន្សល់ទុកក្រោយពីលោកត្រូវបានជួបគ្រោះថ្នាក់ចរាចរណ៍បាត់បង់អាយុះជីវិតនៅលើដងផ្លូវ៦០ម៉ែត កាលថ្ងៃទី៦ ខែមករា ឆ្នាំ២០២៥។

 តែបើទោះបីជាយ៉ាងណា បន្ទាប់ការបាត់បង់ជីវិតអស់រយៈពេលជាង ២ខែ ក៏ពិតមែន តែគ្រប់គ្នានៅតែនឹករលឹកតាមរយៈស្នាដៃបទចម្រៀងល្បីៗមួយចំនួនដូចជា “កន្រ្តឹម west side” និងបណ្ដាស្នាដៃល្បីមួយចំនួនទៀត ដែលលោកបានផលិតជាមួយតារាចម្រៀងរ៉េប លោកវុទ្ធា។ 

យ៉ាងណាមិញ នាពេលថ្មីៗនេះគណនីហ្វេសបុកផេករបស់ លោក Ruthko បានប្រកាសបង្ហាញប្រាប់អ្នកគាំទ្រពីស្នាដៃចម្រៀងចុងក្រោយរបស់ខ្លួនជាមួយ លោក វុទ្ធា មានចំណងជើងថា “នារីកំណាន់” ដែលត្រៀមនឹងចេញជាផ្លូវការនៅ ថ្ងៃទី០៩ ខែមីនា ឆ្នាំ២០២៥នេះ។

ដោយគ្រប់គ្នាបានឃើញហើយនាំគ្នាស៊ែរចែករំលែកទាំងក្ដីនឹករលឹកអាលោះអាល័យ និងអន្ទះសាររង់ចាំគាំទ្រស្នាដៃចុងក្រោយរបស់ លោក Ruthko ក្នុងផលិតកម្ម Klabyahandz ដើម្បីចង់ថាពិរោះ និងអស្ចារ្យយ៉ាងណា ដោយកន្លងមកបទចម្រៀងរបស់ លោក Ruthko ជាមួយ លោក វុទ្ធា គឺទទួលបានសន្ទុះនៃការគាំទ្រខ្លាំងដូចជាបទ West Side ជាដើម។

គួររំលឹកផងដែរថា តារាចម្រៀងរ៉េប លោក Ruthko បានទទួលមរភាពនៅយប់រំលងអធ្រាត្រឈានចូលថ្ងៃទី ០៦ ខែមករា ឆ្នាំ ២០២៥ ដោយសារគ្រោះថ្នាក់ចរាចរណ៍ នៅផ្លូវ ៦០ម៉ែត្រ ការបាត់បង់តារាចម្រៀងរ៉េបរូបនេះ ជាការបាត់បង់ធនធានដ៏មានសមត្ថភាពមួយរូបក្នុងវិស័យសិល្បៈចម្រៀងរ៉េបផងដែរ៕ សម្រួលដោយ៖ Sun Darasy