ឃ្លាំងស្ដុក និងកែច្នៃជ័រស្វិតមួយកន្លែង ដែលមានទីតាំងស្ថិតនៅភូមិកប់អំបិល សង្កាត់កំបូល ខណ្ឌកំបូល រាជធានីភ្នំពេញ ត្រូវបានអគ្គិភ័យឆាប់ឆេះនៅយប់ថ្ងៃទី១៥ ខែមីនា ឆ្នាំ២០២៥ ដោយបំផ្លាញទាំងស្រុងនូវសម្ភារក្នុងទីតាំងឃ្លាំង ដែលមានទំហំ៣,០០០ម៉ែត្រការ៉េ។ការិយាល័យបង្ការ ពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានឲ្យដឹងថានៅថ្ងៃទី១៦ ខែមីនា ឆ្នាំ២០២៥នេះ ទីតាំងឃ្លាំងខាងលើមានម្ចាស់ឈ្មោះ វាល់ សុខារី អាយុ៤០ឆ្នាំ ដែលប្រភេទសំណងថ្មប្រក់ស័ង្កសី ទំហំ៣០០០ម៉ែត្រការ៉េ។ក្នុងប្រតិបត្តិការនៃការជួយសង្គ្រោះកម្លាំងសមត្ថកិច្ចបានប្រើប្រាស់ទឹកអស់ចំនួន១៧៨ឡាន។ ដោយឡែក ចំពោះដើមចមដែលនាំឲ្យមានគ្រោះអគ្គិភ័យកើតឡើង សមត្ថកិច្ចមិនទាន់បានបញ្ជាក់ឲ្យដឹងនៅឡើយទេ ខិតក្នុងការស្រាវជ្រាវយ៉ាងយកចិត្តទុកដាក់។

គួរឲ្យដឹងដែរថា ក្នុងប្រតិបត្តិការសង្គ្រោះនេះ បានបណ្ដាលឲ្យនាយរងការិយាល័យបង្ការ ពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញម្នាក់ បានរងគ្រោះថ្នាក់ដោយសារការបំពេញតួនាទីសង្គ្រោះផងដែរ៕