បណ្ដាអ្នកគាំទ្រវិស័យចម្រៀងរបស់កម្ពុជាបានបង្ហាញអារម្មណ៍រំភើប និងអបអរសាទរ ខណៈបានឃើញផលិតកម្មចម្រៀងខ្មែរ ពោលគឺផលិតកម្មបារមី បានសហការជាមួយក្រុមហ៊ុនអន្តរជាតិដ៏ធំ Empire ដែលនេះជាការបើកទំព័រថ្មីមួយទៀតដែលមិនធ្លាប់មាន និងជាការជួយឲ្យសិល្បៈខ្មែរកាន់តែមានភាពរីចម្រើនល្បីល្បាញសុះសាយទៅកាន់ពីភពលោកឲ្យស្គាល់នូវស្នាដៃ និងសមទ្ធិផលថ្មីៗជាបន្តបន្ទាប់ក្នុងវិស័យចម្រៀងខ្មែរយើង។

នេះបើយោងតាមការបង្ហោះក្នុងផេកផ្លូវការរបស់ ផលិតកម្មបារមី បានប្រកាសបែបនេះថា៖ «ជម្រាបសួរ អ្នកទាំងអស់គ្នា! ថ្ងៃនេះជាពេលវេលាដ៏ពិសេសមួយក្នុងជំពូកតន្ត្រីថ្មីរបស់ផលិតកម្មបារមី។ យើងពិតជាមានសេចក្តីរំភើប ដែលបានប្រកាសថា ពួកយើងបានក្លាយជាផលិតកម្មចម្រៀងខ្មែរដំបូងគេ ដែលចាប់ដៃគូជាផ្លូវការជាមួយក្រុមហ៊ុនអន្តរជាតិធំមួយគឺ Empire។

នៅបារមីយើងតែងតែជឿថា តន្ត្រីខ្មែរស្ថិតនៅលើឆាកអន្តរជាតិ។ ការសហការនេះនាំឱ្យយើងកាន់តែខិតជិតមួយជំហានទៅនឹងចក្ខុវិស័យនោះ ហើយយើងមិនអាចធ្វើវាបានទេបើគ្មានការគាំទ្ររបស់អ្នក។ ជាមួយនឹង Empire ពួកយើងកំពុងឈានជើងចូលទៅក្នុងយុគសម័យថ្មីសម្រាប់តន្ត្រីខ្មែរ ដូច្នេះហើយពួកយើងសូមអញ្ជើញអ្នកទាំងអស់គ្នាឱ្យចូលរួមជាផ្នែកនៃចលនានេះ។ នេះគ្រាន់តែជាការចាប់ផ្តើមប៉ុណ្ណោះ! ពួកយើងនឹងនាំយកនូវអ្វីថ្មីមកជូនអ្នកទាំងអស់គ្នាឆាប់ៗនេះ.....៕ សម្រួលដោយ៖ Sun Darasy