ស្ថានទូតចិននៅទីក្រុងបាងកកបានអំពាវនាវឲ្យក្រុមហ៊ុនចិនដែលកំពុងប្រតិបត្តិការនៅក្រៅប្រទេសគោរពតាមច្បាប់ក្នុងស្រុក បន្ទាប់ពីក្រុមហ៊ុនសំណង់ចិនមួយបានស្ថិតនៅក្រោមការត្រួតពិនិត្យសម្រាប់ការដួលរលំអគារដែលនាំឲ្យមានស្លាប់យ៉ាងរង្គាលនៅក្នុងការរញ្ជួយដីកាលពីសប្តាហ៍មុន។ អាជ្ញាធរ​ថៃ​និយាយ​ថា ពួកគេ​កំពុង​បើក​ការ​ស៊ើបអង្កេត​លើ​ក្រុមហ៊ុន​សំណង់​ដែល​ទទួល​ខុស​ត្រូវ​ចំពេល​មាន​ការ​សង្ស័យ​ថា​ពួកគេ​បាន​ប្រើ​ដែក​ថែប​ដែលមិន​មាន​ស្តង់ដារ​ក្នុង​រចនាសម្ព័ន្ធ។

ការអភិវឌ្ឍន៍នៅជិតផ្សារ Chatuchak ដ៏ពេញនិយមរបស់ទីក្រុងបាងកក គឺជាគម្រោងរួមគ្នាមួយ ដែលពាក់ព័ន្ធនឹងក្រុមហ៊ុន China Railway No. 10 Engineering Group (Thailand) ដែលជាគម្រោងមួយរបស់ក្រុមហ៊ុន China Railway Group (CREC) ដែលជាក្រុមហ៊ុនម៉ៅការសំណង់ និងវិស្វកម្មដ៏ធំបំផុតមួយរបស់ពិភពលោក។

ស្ថានទូតបាននិយាយនៅក្នុងហ្វេសប៊ុកជាភាសាថៃថា រដ្ឋាភិបាលចិនបានជំរុញឲ្យក្រុមហ៊ុនចិននៅក្រៅប្រទេសគោរពច្បាប់ក្នុងស្រុក និងរួមចំណែកជាវិជ្ជមានដល់សង្គម ។ទីក្រុងប៉េកាំងបានបញ្ជូនក្រុមអ្នកជំនាញការជួយសង្គ្រោះ និងបុគ្គលិកសង្គ្រោះគ្រោះមហន្តរាយទៅជួយនៅទីក្រុងបាងកក ហើយបានប្តេជ្ញាថានឹងបន្តជួយដល់ប្រទេសថៃតាមតម្រូវការហើយបានជំរុញឱ្យក្រុមហ៊ុនចិនសហការយ៉ាងតឹងរ៉ឹងជាមួយអាជ្ញាធរថៃ នៅពេលពួកគេស៊ើបអង្កេតការដួលរលំនេះ៕