ភូមិជាច្រើនដែលស្ថិតនៅក្នុងតំបន់មួយចំនួននៅប្រទេសម៉ាឡេស៊ីត្រូវបានរងផលប៉ះពាល់ដោយទឹកជំនន់ភ្លាមៗ បន្ទាប់ពីមានភ្លៀងធ្លាក់ខ្លាំងនៅព្រឹកថ្ងៃទី២៣ ខែមេសា ឆ្នាំ២០២៥កន្លងទៅនេះ។ លោក Ahmad Mukhlis Mukhtar ជំនួយការនាយកដ្ឋានពន្លត់អគ្គិភ័យ និងជួយសង្គ្រោះ Selangor បាននិយាយថា តំបន់ដែលរងផលប៉ះពាល់រួមមាន Sungai Buloh, Petaling Jaya និង Subang Jaya ។

ផ្ទះចំនួន ៨៦ ខ្នងត្រូវបានរងផលប៉ះពាល់ ទោះបីជាមិនមានរបាយការណ៍ជម្លៀសចេញក៏ដោយ។ នៅតំបន់ Kampung Paya Jaras Hilir, Sungai Buloh ផ្ទះចំនួន ៨០ ត្រូវបានលិចដោយកម្រិតទឹកឡើងដល់ ៣ ហ្វីត ទោះបីជាទឹកបានចាប់ផ្តើមស្រកចុះក៏ដោយ។

ទន្ទឹមនឹងនោះ នៅតំបន់ Kampung Baru, Sungai Buloh ផ្ទះចំនួន៦ ត្រូវបានជន់លិចក្នុងទឹកពីរហ្វីត ប៉ុន្តែអ្នកស្រុកដែលរងផលប៉ះពាល់បានបដិសេធក្នុងការជម្លៀសចេញ ដោយសារតែកម្រិតទឹកបានធ្លាក់ចុះជាបណ្តើរៗ។ ទោះយ៉ាងណា មិនមានអ្នករងរបួសណាម្នាក់ត្រូវបានរាយការណ៍ឡើយ ហើយកម្រិតទឹកបានចាប់ផ្ដើមស្រកចុះហើយ៕