១. សម្តេចធិបតី៖ បារាំងជាមិត្តល្អរបស់កម្ពុជាហើយកំពុងធ្វើការជាមួយគ្នាដើម្បីឈានតម្លើងកម្រិតទំនាក់ទំនងការទូតទៅជាភាពជាដៃគូយុទ្ធសាស្ត្រ

សម្តេចធិបតី ហ៊ុន ម៉ាណែត បានលើកឡើងថា បារាំងជាមិត្តល្អរបស់កម្ពុជា ហើយប្រទេសយើងទាំងពីរកំពុងធ្វើការជាមួយគ្នាដើម្បីឈានទៅការតម្លើងកម្រិតនៃទំនាក់ទំនងការទូតទៅជា ភាពជាដៃគូយុទ្ធសាស្ត្រ (Strategic Partnership) នៅពេលឆាប់ៗខាងមុខ។

២. ឯកឧត្តមអភិសន្តិបណ្ឌិត ស សុខា និងលោកជំទាវ ចុះគាំទ្រកងកម្លាំងឈរជើងនៅព្រំដែន

ឯកឧត្តមនាយឧត្ដមសេនីយ៍ អភិសន្តិបណ្ឌិត ស សុខា និងលោកជំទាវ អញ្ជើញចុះគាំទ្រកងកម្លាំងដែលកំពុងឈរជើងការពារបូរណភាពទឹកដីស្របច្បាប់ របស់កម្ពុជា នៅថ្ងៃទី១១ ខែមិថុនា ឆ្នាំ២០២៥នេះ ឯកឧត្តមនាយឧត្ដមសេនីយ៍ អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ បានអញ្ជើញចុះគាំទ្រកងកម្លាំងដែលកំពុងឈរជើងការពារបូរណភាពទឹកដីស្របច្បាប់របស់កម្ពុជា៕

៣. កម្ពុជា នឹងរងសម្ភាធព្យុះទី១ ឈ្មោះ វូតទីព(Wutip) ដែលធ្វើឱ្យផ្ទៃមេឃ មានពពកច្រើន មានភ្លៀងធ្លាក់ពីតិចទៅបង្គួរ

ក្រសួងធនធានទឹក និងឧតុនិយម បានចេញសេចក្តីជូនដំណឹង ស្តីពីការវិវត្តនៃអាកាសធាតុ និងធាតុអាកាសនៅក្នុងព្រះរាជាណាចក្រកម្ពុជា ឱ្យបានជ្រាបថា សម្ពាធទាប ដែលកំពុងគ្របដណ្តប់លើសមុទ្រចិនខាងត្បូងបានវិវត្តទៅជាព្យុះទី១ ឈ្មោះ វូតទីព (Wutip) ក្នុងឆ្នាំ២០២៥ T2501 បានមានឥទ្ធិពលមកលើរបបខ្យល់មូសុងនិរតី សមុទ្រអានជាមម៉ែន ឈូងសមុទ្រថៃ អាងទន្លេមេគង្គ និងលើព្រះរាជាណាចក្រកម្ពុជា។

៤. ក្រុមហ៊ុនចិនផ្តល់ឧបករណ៍លាងឈាមប្រភេទថ្មីដល់កម្ពុជា អាចឱ្យអ្នកជំងឺប្រើប្រាស់ដោយខ្លួនឯងបាន

រដ្ឋមន្រ្តីសុខាភិបាល ឯកឧត្តម ឈាង រ៉ា បានថ្លែងអំណរគុណដល់ក្រុមហ៊ុន Dongze Medical នៃសាធារណរដ្ឋប្រជាមានិតចិនដែលផ្តល់ឧបករណ៍លាងឈាមប្រភេទថ្មីដល់កម្ពុជា អាចឱ្យអ្នកជំងឺប្រើប្រាស់ដោយខ្លួនឯងបាន ខណៈឧបករណ៍លាងឈាមនេះ នឹងរួមចំណែកដល់ការផ្តល់សេវាថែទាំសុខភាពកាន់តែប្រសើរឡើង ដល់អ្នកជំងឺតម្រងនោមរ៉ាំរ៉ៃ។

៥. អភិបាលក្រុង LA ដាក់បម្រាមគោចរមានកំណត់ ខណៈដែលការតវ៉ានៅតែបន្ត

អភិបាលក្រុង Los Angeles លោកស្រី Karen Bass បានដាក់បម្រាមគោចរនៅក្នុងទីប្រជុំជនក្នុងទីក្រុង Los Angeles កាលពីល្ងាចថ្ងៃអង្គារ ដោយស្វែងរកការទប់ស្កាត់ការលួចប្លន់ និងការបំផ្លិចបំផ្លាញ ខណៈដែលការតវ៉ាផ្នែកអន្តោប្រវេសន៍បានអូសបន្លាយដល់ថ្ងៃទីប្រាំ។

៦. មនុស្ស ៨នាក់ស្លាប់ ក្នុងហេតុការណ៍វាយប្រហារភេរវកម្មក្នុងប្រទេសកូឡុំប៊ី

អាជ្ញាធរក្នុងតំបន់បានបញ្ជាក់ថាមនុស្សចំនួន ៨ នាក់បានស្លាប់ និង ២៨ នាក់ផ្សេងទៀតបានរងរបួសកាលពីថ្ងៃអង្គារ ម៉ោងនៅក្នុងស្រុក ក្នុងអំឡុងពេលនៃការវាយប្រហារភេរវកម្មនៅភាគនិរតី នៃប្រទេសកូឡុំប៊ី។

៧. សកម្មជនជ្រុលនិយមថៃ ប្រមូលផ្តុំប្រជាជនទាមទារ​ឲ្យ​រដ្ឋាភិបាល​មានចំណាត់ការលើ​ ៦ចំណុចធំៗ

លោកសន្ធិ​លិម ថងគុល សកម្មជនជ្រុលនិយមថៃ នៅថ្ងៃទី១០ ខែមិថុនា ឆ្នាំ២០២៥ បាន​ធ្វើការប្រមូលផ្តុំប្រជាជនថៃដើម្បីទាមទារ​ឲ្យ​រដ្ឋាភិបាល​ថៃ​ កំណត់ការពារទឹកដីថៃ​អោយច្បាស់លាស់​ ដោយចោទមកលើកម្ពុជាថា កន្លង​មក​ប្រទេស​កម្ពុជា​ ទន្រ្ទានចូលដីថៃ​ ចំនួន៤៧០ដង។

៨. ក្រសួងទេសចរណ៍ និងស្ថានទូតហ្វីលីពីន សហការរៀបចំការប្រគំតន្រ្តីនៅព្រះលានជល់ដំរីដើម្បីផ្សព្វផ្សាយសក្តានុពលទេសចរណ៍កម្ពុជា

ក្រសួងទេសចរណ៍ និងស្ថានទូតហ្វីលីពីនប្រចាំកម្ពុជាសហការរៀបចំការប្រគំតន្រ្តីនាព្រះលានជល់ដំរី ក្នុងឱកាសខួបអនុស្សាវរីយ៍លើកទី៦៨ឆ្នាំ នៃទំនាក់ទំនងការទូតកម្ពុជា-ហ្វីលីពីន និងខួបលើកទី១២៧ឆ្នាំ ​ទិវាប្រកាសឯករាជ្យជាតិហ្វីលីពីន (ASEAN Tourism Forum 2025: Unity in Motion, Shaping ASEAN Tourism Tomorrow)។

៩. មន្រ្តីពាក់ព័ន្ធធ្វើការប្រគល់-ទទួលវត្ថុបុរាណ ចម្លាក់ប្រាសាទអណ្តែតធ្វើពីថ្មភក់ដើម្បីរក្សាទុកនៅក្នុងសារមន្ទីរព្រះនរោត្តមសីហនុអង្គរ

កម្លាំងការិយាល័យនគរបាលការពារបេតិកភណ្ឌសហការជាមួយក្រុមការងារចុះបញ្ជីបេតិកភណ្ឌរូបី នៃអាជ្ញាធរជាតិអប្សរា និងអាជ្ញាធរមូលដ្ឋានចុះទៅធ្វើការប្រគល់-ទទួលវត្ថុបុរាណ (ចម្លាក់ប្រាសាទអណ្តែត) ចំនួន ០១ផ្ទាំង បែកជា ០២បំណែក ធ្វើពីថ្មភក់នៅសាលាឃុំដូនកែវ ស្ថិតនៅ ភូមិរហាល ឃុំដូនកែវ ស្រុកពួក ខេត្តសៀមរាប ប្រគល់ទៅឲ្យលោក ឈូក ម៉ាឡា មន្ត្រីចុះបញ្ជីបេតិកភណ្ឌរូបីនៃអាជ្ញាធរជាតិអប្សរាយកទៅរក្សាទុកនៅក្នុងសារមន្ទីរព្រះនរោត្តមសីហនុអង្គរ។

១០. សមត្ថកិច្ចឃាត់ខ្លួនក្មេងទំនើង០៥នាក់ ពាក់ព័ន្ធករណីកាន់កាប់អាវុធដោយខុសច្បាប់

នាថ្ងៃទី១០ ខែមិថុនា ឆ្នាំ២០២៥ កម្លាំងអធិការដ្ឋាននគរបាលខណ្ឌពោធិ៍សែនជ័យ បានឃាត់ខ្លួនក្មេងទំនើង០៥នាក់ ពាក់ព័ន្ធករណីកាន់កាប់អាវុធដោយខុសច្បាប់ (ដាវកែច្នៃ) នៅចំណុចភូមិប៉ប្រកខាងត្បូង សង្កាត់កាកាបទី១ ខណ្ឌពោធិ៍សែនជ័យ។