ពិធីបើកពិព័រណ៍ “សួស្តីឥណ្ឌូនេស៊ី ២០២៥ - Sousdey Indonesia 2025” ដែលជាកម្មវិធីផ្សព្វផ្សាយពាណិជ្ជកម្ម និងទេសចរណ៍ឥណ្ឌូនេស៊ី បានបើកជាផ្លូវការក្រោមអធិបតី ឯកអគ្គរដ្ឋទូតឥណ្ឌូនេស៊ីប្រចាំកម្ពុជា លោក Santo Darmosumarto និង ឯកឧត្តម បួន សារៈមុនី រដ្ឋលេខាធិការក្រសួងពាណិជ្ជកម្ម នៅសាលពិព័រណ៍កោះពេជ្រ នាថ្ងៃទី១៤ ខែមិថុនា ឆ្នាំ២០២៥។

ក្នុងឱកាសនៃពិធីបើកនេះ ឯកអគ្គរដ្ឋទូតឥណ្ឌូនេស៊ីប្រចាំកម្ពុជា លោក Santo Darmosumarto បានបញ្ជាក់ថា ព្រឹត្តិការណ៍ឆ្នាំនេះ មានគោលបំណងត្រាប់តាមស្មារតីនៃមិត្តភាព និងកិច្ចសហប្រតិបត្តិការ ខណៈ “សួស្តីឥណ្ឌូនេស៊ី ២០២៥ - Sousdey Indonesia 2025” មានគោលបំណងបើកឱកាសសម្រាប់ការគាំទ្ររបស់ឥណ្ឌូនេស៊ីនៅក្នុងវិស័យអាទិភាពដោយរដ្ឋាភិបាលកម្ពុជា ដូចជាការថែទាំសុខភាព និងការអប់រំ។

លោកឯកអគ្គរដ្ឋទូតបន្ថែមថា ពិព័រណ៍នេះក៏បានស្វែងរកការធ្វើជាស្ពានសម្រាប់កិច្ចសហប្រតិបត្តិការកាន់តែស៊ីជម្រៅ ពង្រឹងទំនាក់ទំនងមិនត្រឹមតែរវាងអាជីវកម្មប៉ុណ្ណោះទេ ប៉ុន្តែថែមទាំងក្នុងចំណោមប្រជាជនឥណ្ឌូនេស៊ី និងកម្ពុជាផងដែរ។

ជាមួយគ្នានេះ ឯកឧត្តម បួន សារៈមុនី ក៏បានលើកឡើងដែរថា ព្រឹត្តការណ៍នេះមានគោលបំណងពង្រឹងទំនាក់ទំនងពាណិជ្ជកម្ម កិច្ចសហប្រតិបត្តិការរវាងកម្ពុជា និងឥណ្ឌូនេស៊ី ជាពិសេសផ្ដល់ឱកាសដល់វិស័យឯកជនក្នុងការចែករំលែកចំណេះដឹង ស្ដីពីអាជីវកម្ម ការវិនិយោគ និងផ្លាស់ប្ដូរវប្បធម៌គ្នាទៅវិញទៅមក។

ព្រឹត្តិការណ៍តាំងពិពណ៌ទោលរបស់ឥណ្ឌូនេស៊ី ដែលពីមុនត្រូវបានគេស្គាល់ថាជា កម្មវិធីផ្សព្វផ្សាយពាណិជ្ជកម្ម និងទេសចរណ៍ឥណ្ឌូនេស៊ី ​ធ្លាប់​បាន​ប្រារព្ធ​ឡើង​ចំនួន ១៥ ដង​ចាប់​តាំង​ពី​ឆ្នាំ ២០០៦ ត្រូវ​បាន​គេ​ដាក់​ឈ្មោះ​ជា​ថ្មី​ដល់ Sousdey Indonesia ក្នុង​ឆ្នាំ ២០២៤ ដើម្បី​ឲ្យ​ប្រជាជន​កម្ពុជា​ស្គាល់​កាន់​តែ​ច្បាស់។

ព្រឹត្តិការណ៍ឆ្នាំនេះមានអ្នកតាំងពិព័រណ៍ចំនួន ៥២ ដោយមានសមាសភាពប្រកបដោយតុល្យភាពនៃអ្នកចូលរួមមកពីប្រទេសកម្ពុជា និងឥណ្ឌូនេស៊ី តំណាងឱ្យវិស័យដូចជាការអប់រំ ម៉ូដ និងគ្រឿងប្រើប្រាស់ អាហារ និងភេសជ្ជៈ គ្រឿងសង្ហារិម ឧបករណ៍ប្រើប្រាស់ក្នុងផ្ទះ និងឱសថ និងការថែទាំផ្ទាល់ខ្លួន៕